靚抽王
沒台翻身三大 S橋
大台近日推出嘅《沒女大翻身》，雖然引起咗注目，但係都係以負面意見居多，網民認為節目踐踏女性樽鹽，加上高登巴打踢爆新移民「阿銀」同埋形象導師 Eva Lau曾經以大台員工身份訪問示威行動，極有造假之嫌。另一邊廂，其中一名沒女 Meggie曾經喺有線《峰生水起精讀班》被蘇民峰睇過相，疑似係專業「演員」。總之明眼人都感覺到呢個節目嘅做媒味好濃。不過唔緊要，我哋《 S橋王》一樣會幫大台諗掂佢！
S橋王
每期 S橋王幫娛圈偽人偽事度橋脫身。你知啦，呢行好複雜，有乜事俾人捉到正，好大鑊㗎嘛！不過唔緊要，我哋會為你出謀獻策嘅！ Super~~
沒男大翻身
有香港小姐，於是就有香港先生。大台諗得出沒女，以佢哋有限嘅創意，下一輯應該就係沒男。佢哋會搵一大堆樣貌不佳、唔靚仔、五官唔夠端正嘅男子出嚟俾大家公開恥笑，再邀請一班自己都未搞得掂嘅人生導師大談廉價哲理。其實大台點會唔知呢啲 S橋會換來劣評？只係佢哋特登放到成地花生谷收視啫。
沒官大翻身
高官膠事醜聞無日無之，呢邊廂有梁太倒抽一口涼氣，嗰邊廂有劏房波買劏房收租。今時今日我哋嘅官員咁唔得民心，大台作為維穩基地，一定要做番啲嘢！我哋建議邀請香港 97年前嘅殖民地高官，擔任高官導師，指導狼班子一行人嘅為官之道。到時大家喺電視上睇到彭定康教梁振英禮義廉，一定非常精彩，收視唔過 50點，叫阿叻跪返屋企都得
叛徒大花生
大台留唔住台中藝人，連親生仔 Chok峯都要叛逃，近日宣傳內地新劇《衞子夫》時，仲暗串香港演員唔夠墨水，頗為囂屎。既然係咁，不如整番個娛樂節目，邀請番呢啲大台叛徒上嚟，同佢哋真情剖白，質問吓佢哋點解明明有盆菜食都唔留喺度？當然， Chok峯仲後生，所以要等多幾十年，等佢身體唔係咁好，你就可以揸架輪椅，推佢入嚟，然後逼佢笑，笑完再送隻 TVBuddy俾佢。
結論：
所謂沒女，即係沒美貌、沒身材、沒青春、沒學歷、沒財富、沒家世的女人；至於咩叫沒台，
就係沒創意、沒原則、沒品味囉……
|
鍾意就快D Share啦！
|
|
|