14/8 拖實阿仔
身穿軍綠色中袖外套、着住大熱 Reebok× Bape波鞋的千嬅，冇化妝下，面無血色。她與母親及外傭齊齊拖住 2歲大囝囝 Torres放學。 Torres的紅色書包上亦掛上千嬅至愛的鬆弛熊公仔，非常得意。
滾熱辣
丁子高鋪路入名校 千嬅湊仔開學大陣仗
楊千嬅和丁子高結婚 6年來，一直人前恩愛，不過兩夫妻一齊生活，始終也有拗撬。早前有指丁子高恨女，偏偏事業心重的千嬅則揚言冇期揼多件。
千嬅囝囝 Torres（丁進諾）現時已經兩歲，絕對夠歲數入讀幼稚園學前班。據知千嬅對囝囝入學問題十分緊張，曾通宵上網搵學校資料，結果熬出病來。丁子高唔想老婆勞碌，於是擸走揀學校大權。
丁子高話事，替 Torres報名他曾就讀的維多利亞幼稚園，千嬅當然冇聲出。上周四（ 14日），學前班開學，千嬅與母親及外傭一行三人，親自護送 Torres返學，認真架勢。
Torres全程冇扭計
由於黃雨關係，今年開學日由 8月 13日順延一日。上周四（ 14日），早上 8時 40分，千嬅與母親親自湊 Torres到幼稚園，比原定返學時間提早了 5分鐘，可見她十分緊張。
千嬅帶了 Torres入課室後，自己與母親則坐在課室外觀察 Torres上課過程，有家長表示冇諗過自己小朋友的同學仔會是千嬅囝囝。「千嬅好專注，猛咁望住 Torres仔，不過佢個人都幾 cool，冇同我哋班家長傾湊仔經。 Torres仔幾叻仔喎，全程冇扭計之餘，仲一啲都唔緊張，成日撩啲同學仔傾偈。哎！我個女就喊到收唔到聲喇！」一名家長透露。
搵學校捱出病
由於學前班是半日制形式，因此當日約中午 12時，千嬅便拖住 Torres離開幼稚園。記者發現上了大半日堂的 Torres依然醒神，反而身邊的千嬅一臉倦容。
其實千嬅為了囝囝的入學問題，早於大半年前已着手準備。她希望囝囝將來學有所成，試過在百忙之中也抽空親身到幼稚園視察，然後通宵上網搵資料，寧願唔瞓覺也上討論區瀏覽家長對每間幼稚園的評語，最終因體力透支捱出病來。據知丁子高當時就叫千嬅放手唔好管，「千嬅生完仔後，身體的確冇以前咁好，舊年已經試過秘密入院割子宮纖維瘤。一直乜都聽老婆話嘅丁子高，今次唔再女尊男卑，決定揸番次主意，話揀學校嘅嘢等佢話晒事喎！」
千嬅深知自己力有不逮，加上有多部片約在身，無奈妥協，俾老公揸旗。而丁子高偏向揀傳統學校，讓囝囝學懂尊師重道，希望囝囝效法他。他曾說：「屋企人已經好錫個仔，所以想佢讀書有番啲壓力。我以前讀聖若瑟小學，所以都希望個仔第時讀呢間。」
丁子高：我揀呢間
曾就讀維多利亞幼稚園的丁子高，對此校亦有情意結，難怪他替 Torres報讀此間。周一（ 18日），記者就此事致電丁子高，他說：「係我揀呢間學校㗎！我細個都讀呢間，但我依家開緊會，轉頭先覆你。」不過記者隨後已聯絡不上他。至於千嬅，則向本刊記者說：「多謝你哋關心，我個仔都開始需要讀書㗎喇！咁只不過做番正常家長同小孩子嘅嘢，所以唔回應太多，因為唔想影響其他小朋友返學，都希望佢有簡單開心嘅學校生活，想保持一個低調簡單俾小朋友成長。」
自小培訓
現時學位競爭激烈，小朋友為入名校已經被鍛煉得周身刀張張利。雖然 Torres只得兩歲，但千嬅和丁子高早於去年已為囝囝報讀五花八門的興趣班。
星二代爭住讀
全港有 11間分校的維多利亞幼稚園，由於其機構在香港設有中學和小學，提供一條龍升學服務。加上在此幼稚園畢業的學生，有九成多可以升上 Band 1小學，故吸引不少名人、藝人為仔女報讀。李嘉欣囝囝小 JM、甘比女兒都是這所學校的學生。
千嬅囝囝 Torres就讀的學前班，官方名稱叫小組班，每月學費連同其他雜費約六千蚊，學校採用兩文三語教學。
|
鍾意就快D Share啦！
|
|
|