素顏送老公坐早機出埠開工的田蕊妮，邊行邊「放蚊」。
探熱針
大酬賓 求志偉打救 杜汶澤大劈價𢱑撈
因為衰多口被大陸封殺、中港兩地冇人敢搵佢開工的杜汶澤，敗走美國避風頭兩個月後，日前正式復工，拍攝馬來西亞資金投資的新戲《麻雀王》。據知唔想手停口停的杜汶澤，向有份演出兼埋班的曾志偉搭路𢱑撈，並開出三折片酬，但求有工開。
劈價𢱑撈
停工兼絕跡社交網站兩個月的杜汶澤，今個月初在網上公告天下，準備出發去馬來西亞開工。現時人在怡保的他，正與曾志偉、葉璇、王敏奕等為電影《麻雀王》開工。
據了解，電影月前經曾志偉埋班搵演員開工，收到風的杜汶澤，於是主動𢱑撈。「老爺（曾志偉）喺東南亞人面廣，當地啲電影公司好多時會經佢搵演員開戲，講真，阿澤家陣又唔返得大陸，就算港產片，金主係大陸人，啲戲又要返大陸上，阿澤根本冇路行，既然套《麻雀王》全數馬拉資金，佢梗係要搵老爺救命」知情人說。
杜汶澤的角色，志偉原本屬意由羅家英或田啟文擔演，但有人自動送上門之餘，又肯放下身段，將原本高峰期實收三百萬片酬，三折大劈價到一百萬，一向講義氣的志偉，最終預埋杜汶澤開工。
老婆送機
終於有工開，要留在馬拉一個月的杜汶澤，月初由太太田蕊妮親自送機。辦理完登機手續，兩公婆同助手先到離境大堂二樓的餐廳醫肚，夠鐘入閘，兩公婆十指緊扣步向離港閘口，眼利的杜汶澤發現記者，先叫素顏老婆離開，再以高八度聲線同記者講：「去開工！」
早前杜汶澤憑《低俗喜劇》及《 3D豪情》人氣急彈，但因為公開撐台灣反服貿學生，被國內網友圍插「反中亂港」，杜汶澤因留言反駁「有本事阻止我來大陸」，最終激起民憤，被內地封殺。衰多口，並非第一次，但今次杜汶澤累埋街坊，首先由他與阿 Sa合演的新戲《放手愛》，票房慘淡收場，另外原本有份拍賀歲片《賭城風雲 2》的他，角色最終改由張家輝頂上，甚至原定暑假開拍、由杜汶澤執導的新片《悲慘世界》，亦全面叫停。難怪要自降身價，馬拉片都照拍。
禍從口出
杜汶澤一向口不擇言，圈中出名得罪人多，天王劉華、天后 Joey都同佢反面。
劉德華
阿澤結婚、劉華做伴郎，原本兄弟同心，後來因華仔拒投資《伊沙貝拉》續集，被杜汶澤「四圍唱」，自此二人反目收場。
容祖兒
今年初，現身伍樂城演唱會，杜汶澤在台上自爆隨口噏要捧容祖兒做影后，成功氹掂楊受成揼水開戲，結果自己做了影帝。原本只為搞氣氛，卻辣㷫容天后，更在微博留言公開反面，一向唔認錯的杜汶澤事後罕有地兩度公開向 Joey道歉。
|
鍾意就快D Share啦！
|
|
|
