熱爆娛樂: [壹週刊 1275] 真識食　扮英雄　博好感　崔建邦𥄫中蔡思貝蔡思貝,崔建邦,M1,

2014年8月14日星期四

[壹週刊 1275] 真識食　扮英雄　博好感　崔建邦𥄫中蔡思貝蔡思貝,崔建邦,M1,

探熱針

真識食　扮英雄　博好感　崔建邦𥄫中蔡思貝

屢獲無綫放生的崔建邦，近年事業未見起色，但溝女卻交出亮麗佳績，除繼續與拍拖九年的唐詩詠關係糾纏不清，最近主持《瘋狂夏水禮》，近水樓台𥄫中去年港姐亞軍、現年二十三歲的蔡思貝。

到內地外景拍攝期間，蔡思貝因頻頻 NG，被另一主持林曉峰當面糟質，搞到匿喺酒店房偷泣，崔建邦即時英雄上身，公開護花，搏蔡思貝好感。

溝女溝出面，崔建邦飲大兩杯後，更向工作人員直認：「我好鍾意呢個女仔（蔡思貝）！」三十五歲崔建邦，果然識食。

酒店房爆喊

外表甜美的蔡思貝，當選港姐後深得無綫高層余詠珊關照，主持、拍劇雙線發展，工作浪接浪，可惜表現追不上得寵度，被幕後工作人員封為「 NG王」。

「蔡思貝咁新，又要拍劇，又唔夠經驗，表現差過阿 Lo（林曉峰）同 Amigo（崔建邦）都好正常，但佢次次都將一句對白分三截講，食螺絲食到飽，加上拍《瘋狂夏水禮》，全部室外景，又熱又曬，阿 Lo把口又唔收，成日窒蔡思貝：『喂，你第一次做主持？』又專登掟佢落水，玩到佢盡。」知情人說。

俾林曉峰當面糟質，蔡思貝表面任玩唔嬲，實質夜晚返到酒店經常忍唔住爆喊，輾轉從同事口中知道「女神」偷泣的崔建邦，決定把握機會借安慰以及私人教授司儀技巧做藉口，製造二人獨處機會。

拍《瘋狂夏水禮》時，蔡思貝經常被林曉峰糟質，不時將她推落水，她次次都向崔建邦求助，拉住他的手借力，崔建邦簡直成為她的英雄。

蔡思貝近期既要做主持，又要拍新劇《衝線》，不夠時間預備，日前她跟沈震軒拍戲時狂 NG，搞到沈震軒黑面。

其實唐詩詠跟蔡思貝的樣子頗為相像，崔建邦口味一致。

早前唐詩詠跟古天樂拍戲傳緋聞，崔建邦即時挺身幫她澄清，可見二人關係密切，一直糾纏不清。

酒後吐真言

「 Amigo溝女經驗老到，條女當晒佢係好人。之後蔡思貝每次 NG，如果有人黑面， Amigo就會大大聲幫口：『人哋係新人， NG咪嚟過囉！』平日佢邊有咁好死！有晚收工去飲嘢， Amigo飲大兩杯仲自爆冧蔡思貝，其實佢唔講，明眼人都睇得出佢嗒晒糖啦。」知情者說。

知道蔡思貝討厭打機宅男，鍾情上進型男性，為討好女神，崔建邦拍攝時表現分外積極，又標榜自己唔鍾意打機鍾意打泰拳，以上進拳王形象博取蔡思貝歡心，崔建邦果然用心良苦。