上週六（ 2日）下午到港嘅少時，即趕去亞洲博覽館。可能攰得滯，加上唔夠時間綵排，卒之經常走錯位，令觀眾感覺少時 hea住唱。
真面目
冇腳睇 Jessica走甩瘟仔 長褲少時 hea唱
對於韓飯來講上個禮拜真係忙到甩肺。上週二（ 29日）先嚟 BIGBANG 3子為《神魔之塔》來港宣傳，去到星期六（ 8月 2日），韓國 No.1女團少女時代連同 BIGBANG勝利、新紮男團 B.A.P.及 100%來港開雜錦騷《 Best of Best in HK 2014》，少啲精力都追唔到星。
不過可能因為雜錦騷，加上票房差，壓軸表演的少時表現得冇乜心機，走錯位、轉錯身，甩嘴樣樣齊，最弊連對長腿都唔畀人睇，真係好失望。完騷後，齊齊操去機場的少時大軍竟然少減件，原來 Jessica改機票留港陪男友，至週日（ 3號）晚才離開香港。
Q： K-pop水平咁高，但點解女團 No.1的少時今次 hea咗？
A：由於今次演唱會係雜錦騷，加上少時 9位成員開騷當日先到埗，可能綵排時間唔夠，所以開騷時出現多次甩漏。尤其泰妍同孝淵，一時走錯位、一時轉錯身，加上大會咪頻頻出事，秀英、 Jessica同允兒演唱時多次冇聲，不過可以證明少時唔係咪嘴囉。 hea都算，不過少時出名係長腿，當晚個個着晒長褲，冚實雙長腿，想點？
Q：完騷後，各成員即坐凌晨機飛返韓國，剩係唔見 Jessica？
A：有探子回報， Jessica完騷後當晚，並冇跟大隊走，而且獨自留港。而且有人見到當晚 Jessica緋聞男友 K先生（權寧一）亦有捧場， Jessica留港瘟仔唔出奇。
Q：少時 hea，但新紮男團 B.A.P.表現好搏喎？
A：冇錯，打頭陣出場嘅 B.A.P.因為要同另一新男團 100%爭上位，所以演出特別落力。雖然當晚 B.A.P.着住西裝打扮斯文，但唱出大熱歌〈 1004〉同〈 One Shot〉時，跳上超勁 K-pop舞，舞姿齊而有力，率先搞 high全場觀眾。
Q：點解個騷見到咁多空櫈嘅？
A：當晚入座率只得 7成，無論後座同前排企位都見到好多空位，據聞今次《 Best of Best in HK 2014》售票率麻麻。而開騷前 1日，甚至發現官方 fb有免費飛散出嚟添！
老閉影晒 Jessica K先生電梯激咀
上週六（ 2日）隨少女時代來港開騷的 Jessica，其實兩星期前（ 19日）亦秘密來港，同暗交 1年嘅阿嬌前男友 K先生（檸寧一）短聚幾日， K先生當然唔少得陪住 Jessica吃喝玩樂，更帶 Jessica上去佢位於中環 ifc嘅辦公室參觀。難得合體， 2人連搭𨋢時間都唔放過，趁冇人時即忍唔住啜嘴，不過最搞笑係佢哋啜爆過程，全部被𨋢內嘅閉路電視拍低，當時班「食蕉」哥哥，個個都睇到眼凸凸。
快閃袋千萬 G-Dragon激罕賣萌
少時來港 hea跳，相反另一隊 K-pop班霸 BIGBANG就落力得多。
BIGBANG成為手機遊戲《神魔之塔》最新代言人，上星期二以代言身份
訪港宣傳。傳聞 BIGBANG今次的代言酬勞達千萬港幣，唔知係咪因為呢個原因， BIGBANG今次來港都比之前落力，勝利同太陽除咗努力講廣東話，經常擺出一副 cool樣的隊長 G-Dragon仲罕有咁由頭笑到尾，又在台上賣萌。
輕易袋千萬喎，唔笑對唔住自己
BIGBANG成員的 G-Dragon（ GD）、勝利同太陽在上星期二（ 29日）快閃襲港，以代言人身份出席手機遊戲《神魔之塔》宣傳活動。
BIGBANG的勝利（左二起）， G-Dragon同太陽《神魔》老闆曾建中（左一）及 YG Entertainment高層蔡先生齊齊舉起象徵神魔的五元素圖案。請得郁 BIGBANG，《神魔》畀嘅酬勞當然係天文數字。
勝利改機票行 outlet
貴為 K-pop一哥又係潮界 icon， BIGBANG一向做自己，唔使好似其他少男團體賣親民賣萌。但今次傳聞代言人酬勞達千萬，所以 BIGBANG亦相當合作，除了講中文冧 fans， GD更罕有頻頻大笑，呢類畫面在韓國都未必睇到。
活動完結， GD同太陽即趕到機場乘飛機返韓國繼續開工，而勝利就留在香港繼續 Happy。
經常改機票賣甩記者同 fans的勝利，今次訪港亦改了 6次機票。原本勝利於上週一孖住 GD坐飛機來港，點知勝利臨時要求改機票，變成翌日同太陽同機。活動後，勝利又要求改機票至上週三凌晨先離港，原來勝利想去鴨脷洲海怡行連卡佛同 Joyce等 outlet。行完 outlet，勝利又話想落旺角，但由於保安話旺角人多車多，勝利出現一定造成混亂，所以勝利最終取消去旺角 shopping，回君悅酒店食 room service，再坐凌晨機返首爾。
|
鍾意就快D Share啦！
|
|
|
