長至肚臍
上周三（ 3日），羅家英換波衫踢波時，唔覺意露出今年手術留下的七吋疤痕。
滾熱辣
割肝瘤痛足三個月 羅家英肚現 7吋疤
今個月 22號是羅家英 68歲的生日， 05年做化療戰勝第三期肝癌的他，十年來戰戰兢兢，盡量保持健康生活，戮力控制癌細胞不會復發。但今年初，他進行例行身體檢查時，發現左肝長出一粒 2cm腫瘤，立即入養和醫院，接受最新的「高速螺旋放射治療」，切除腫瘤。
事隔半年羅家英身體逐漸康復，上周三（ 3日）羅家英到九龍灣與「明星足球隊」踢波，他換波衫時露出肚皮上一條七吋長的紅色手術疤，非常顯眼。羅家英多年來為擊退病魔，動過多次手術，難怪與他共同經歷生死關頭的汪明荃，上周六（ 6日）在澳門開騷時，亦有感而發：「我真係要對我老公好啲！」
自年初入院切除左肝腫瘤，羅家英留在家中休養了一段時間。一向熱愛踢波的他，今年中才歸隊「明星足球隊」，逢星期三下午到九龍灣足球場踢波。雖然羅剛大步檻過，但為保持強健體魄，落場後亦落力在球場上奔跑。
不介意傷疤曝光
上周三（ 3日），羅家英一如以往到球場踢波。正當他行埋座位區換衫之際，記者發現他肚皮上有一條長達 7吋，由胸口直落肚臍下的疤痕，而且疤痕呈深紅色，非常顯眼。雖然他得悉現場有記者，但毫不介意疤痕曝光，甚為豁達。
據知這條 7吋疤痕是今年初切除肝腫瘤手術時所留下。知情人士說：「家英哥做手術前已經知道肚上面會留低咁長嘅疤痕，但只要換到健康，一條半條疤痕對於佢嚟講又有乜所謂呀！反而佢預計唔到完咗手術之後，個傷口依然好痛。手術後三個月，佢就算喺屋企郁動都要就住就住，動作大少少都痛到標眼水，阿姐見到唔心痛就假。」
好友相繼離世
羅家英近年百病纏身，一早對生死看化，加上他身邊好友例如劉家良、紅線女等相繼離世，令他覺得做人應該要及時行樂，汪明荃亦被他這種心態感染。知情人士說：「阿姐以前做嘢冇一刻停過落嚟，拍完劇又開綜藝節目，仲要推動粵劇發展，搞『八和會館』會務，休息都冇時間。加上佢同家英哥分開住，好多時一個禮拜都只係見得一次咁大把。不過阿姐近年眼見老公咁辛苦抗病，去年開始，佢刻意減工作陪老公。」難怪短短半年，他們已一齊去了三次旅行。
晏睡晏起養生
羅家英：疤痕似剖腹產子
上周六（ 6日），羅家英特登到澳門為老婆演唱會做嘉賓，提到肚皮上的七吋疤痕時，他講笑說：「係呀，條疤痕好似剖腹產子咁！」不過當記者糾正他開刀生仔的疤痕是向橫時，他搞笑說：「係咩！乜咁㗎！我唔知呢啲嘢！」
上周六（ 6日），汪明荃到澳門開騷，羅家英亦專登跟埋去，除乘機拍拖外，他更在台上客串，唱番兩嘴。
經歷過病魔折磨的他，在台上不忘告誡觀眾：「上咗 45歲最好半年或者一年檢查一次身體，如果我唔係咁，已經咁㗎喇！」此時他做出拜拜手勢，示意曾與死亡擦身而過。
完騷後他更向本刊透露現時密密做運動：「我除咗定時檢查身體之外，咪踢吓波囉，有時打吓高爾夫球，要飲多啲水，我食嘢食七成㗎咋。但我唔會早睡早起，而係晏睡晏起。半夜一點鐘瞓到中午十二點起身，一攰就要瞓覺，一有時間就瞓覺。」對於肚皮上留下七吋長疤，他說：「當時做咗八個鐘頭手術，真係好痛，條疤好長。其實我有兩條疤㗎，不過呢條粗啲，好似人哋剖腹產子咁。」識得玩自嘲，證明他非常樂觀。
阿姐口硬心軟
提到羅家英手術後迅速復原，身旁的汪明荃則表示非自己功勞，她說：「佢唔使我照顧，我又唔識煮嘢，係佢照顧我多啲！」對於老公肚皮上留疤，她滿不在乎說：「哦！係 N年前嘅事」其實阿姐口硬心軟，她開騷時在台上便有感而發說：「我覺得以前自己都係着重喺事業方面所以我依家要對我老公好啲。其實家庭好重要，無論喺出面做咗幾多嘢，冇人同你分享，冇人同你一齊去解決問題，始終覺得少咗啲嘢！」
年紀大不適合微創
羅家英年初做手術切除 2cm肝腫瘤，留下長達七吋疤痕。腫瘤外科黎卓光醫生說：「一般小於 5cm嘅肝腫瘤手術，可以做微創，唔會留下長傷疤，而且一般不會打直開刀，但又視乎腫瘤位置而定。」
不過做微創切除只適用於腫瘤生在肝臟邊緣位置，加上若果病人心肺功能不佳，是不適宜做微創手術。因為手術過程中會將氣體灌注入腹腔內，氣體會壓迫心肺，提高心肺衰竭風險。羅家英今年初做切除腫瘤手術時，已經 67歲，屬於高齡病人，其心肺功能較弱，故採用傳統切除手術會比較適合。
及時行樂
羅家英今年初又患上大病，令他悟出做人要及時行樂的道理，所以他短短半年間，去過不同地方旅行擴闊視野，其中三次更與汪明荃同行。
老友讚堅強
羅家英做切除左肝腫瘤手術後只有 7個月，不過他身體復原很快，他一班圈中好友也讚他夠堅強，心理質素相當好。
|
鍾意就快D Share啦！
|
|
|
