靚抽王
外國嚇鬼整容實錄
現代整容技術已經進化到一個古人睇到，古人都唔會相信嘅地步，乜鬼嘢好假的 V臉、精裝木偶奇遇記嘅木偶鼻，我哋香港人睇開電視都見慣見熟。只不過，相比起外國好多整容個案，香港都仲未達到世界級，今日我哋就帶大家衝出香港，睇吓除咗 MJ之外，外國嘅整容，可以去得幾盡。
第一位：泰國黑色小肥谷化身美女
呢個大眼又白滑嘅泰國美女如果嚟到香港，就算做唔到大台演員，都一定可以做到𡃁模。但係佢唔係一個普通嘅女人，因為佢以前根本就唔係女人，而係一個男人！可喜嘅係，佢變性之前係一個皮膚黑媽媽仲有啲囂屎嘅霸氣肥仔，甚具星味，足以擔演星爺啲戲入面類似醬爆、六師弟一樣嘅諧角。
第二位：韓國撞臉選美
韓國乃係整容大國，呢個係人都知啦，一個個闊面細眼嘅韓女，化身成一個個大眼仔鼻高高。呢啲人造美女，逐個出場都唔係好覺有乜問題，畢竟佢哋眼耳口鼻都係價值連城，但係當佢哋一齊參加韓國小姐，就難免撞口撞臉……呢幅圖來自韓國小姐 2013，似乎係意味住：韓國小姐係同一個阿媽生？
第三位：歐美騎爆扮嘢大賽
呢兩個似模似樣嘅烏克蘭 Barbie姊妹花絕無血緣關係，佢哋之所以咁似樣，因為佢哋都對 Barbie情有獨鍾，同埋都接受過整容手術。唉，我哋都明 Barbie係少女嘅共同夢想，正如我哋都明啲男生好鍾意鐵甲萬能俠一樣，問題係唔通啲男仔大個咗就要整到好似鐵甲萬能俠咁嘅樣咩？買模型砌咪得囉？何必搞自己？
膠事國際
國際膠事無奇不有，每期膠事國際為你帶嚟最熱門世界性嘅膠事話題。
|
鍾意就快D Share啦！
|
|
|
