十指緊扣
約一個多鐘後，二人離開餐廳。戴番口罩、頭戴畫家帽兼着長袖衫的梁潔華雖全程唔肯接受訪問，但態度友善。而身旁的黃日華則開心說：「佢依家 OK㗎！」其間二人十指緊扣，非常恩愛。
娛樂喧
梁潔華初癒 下月搬屋改運 黃日華：可以為佢犧牲一切
梁潔華去年為治血癌，醫院、酒店兩邊穿梭，經過九個月五次化療，終於戰勝癌魔，逐漸康復。黃日華為迎接老婆「新生」，買入風水格局利健康的比華利山新竇，並計劃下月入伙。
初癒的梁潔華，蟄伏多月終於出山與老公拍拖撐枱腳。而經此一劫，黃日華與老婆感情大躍進，黃更激動說：「發生呢件事之後，我先知佢（老婆）喺我心目中有幾重要，我可以犧牲自己所有嘢……」
今年 7月， 54歲的梁潔華終於完成化療，康復情況十分理想。雖然今次抗癌成功，但仍要小心留意血液的正常指數，因此現時她還需要定時入院檢查，兼抽取體內 DNA，確定癌細胞有冇被徹底擊退。
抽 DNA培植細胞
知情人士說：「佢（梁潔華）係一個好勇敢嘅病人，醫生建議任何療程，佢都樂意配合，從來冇諗過放棄。今次佢要抽 DNA，除咗徹底 check吓佢嘅癌細胞有冇潛伏，仲想搵強壯 DNA作培育，然後再注入佢體內，減少復發機會。」據知梁潔華現時正等待檢驗報告，不過入院足足有 9個月的她，已心急想過番正常人生活。
早前，本九龍城發現黃日華和梁潔華兩公婆開餐，雖然梁當日還穿上長袖衫保護身體，但精神不俗。她發現記者後，沒有迴避鏡頭，更向記者揮手打招呼。
就檢驗 DNA一事，記者搵過黃日華求證，他輕鬆地說：「係抽過骨髓同驗 DNA，依家等緊報告出，如果所有嘢 OK正常的話，算叫做康復啦。佢休息多幾個月，就可以返工。」
新居設誦經房
黃日華終於可以放下心頭大石，為了讓太太保持健康的身體，一直篤信風水的他，早前便豪花千八萬，購入大埔比華利山一幢逾三千呎的獨立屋。知情人士說：「雖然梁潔華嘅醫藥費要成幾百萬，但從事保險嘅佢，一早買咗份大額保險，所以真係一個仙都唔使俾。雖然華哥近年為咗照顧太太減少開工，但呢幾年佢幫王維基拍劇搵唔少，阿女又自動波話要供樓，加上比華利山風水好，間屋唔買唔得。」
現時新居裝修得如火如荼，預計下月正式入伙。由於黃日華和梁潔華當年在九龍塘創價學會舉行婚禮，兩公婆同屬「日蓮正宗」的信徒，因此新居亦順理成章特設一間誦經房。對於即將搬入新居及設有誦經房，黃日華不願多談，但就承認頻頻唸經保太太平安，他說：「其實太太病咗到依家，我都日日早晚誦經，為太太祈福，希望佢快啲好番晒！」
黃日華：仲想拖多 30年
太太由證實患上血癌到現時康復，足足用上近一年時間。如今雖然事過境遷，但回想當日頻頻入院探望太太、在病房等報告的種種情景，他突然感性說：「件事發生得太突然，佢（指梁潔華）一定好驚，我同自己講正正因為佢驚，我一定唔可以驚。尤其治療時間咁長，佢瞓喺病牀上一定會諗好多嘢，呢個時候身邊嘅人最重要，我除咗開工就將所有時間俾晒佢，亦勤做運動同注意休息，唔係為自己，係因為我要有好嘅身體，先有體力照顧佢。」
黃日華和梁潔華如今已經結婚 26年，喜怒哀樂甚麼也經歷過，夫妻關係一早欠缺火花，太太患病一事令這段關係昇華，「經過今次，我同太太都更加珍惜對方，希望我哋兩個可以拖住手再行多 30年以前見啲老夫老妻拖住手，心諗有冇搞錯呀，但依家就覺得原來係好難得㗎。我真係好愛佢，好需要佢。」
|
鍾意就快D Share啦！
|
|
|