[忽然1周 999] TVB賺錢都裁員 藝員局住做 TVB,MW,

今次被裁嘅 50名大台員工，多數係資深幕後人員。而幕前，暫時只有一位收費生活台嘅主持被裁，不過大台一向人工奀，收視又不斷跌，藝人嘅外快都少咗，一樣慘。

媽咪姐

TVB賺錢都裁員　藝員局住做

呢排 TVB認真多事！除咗唔少港男港姐好似高鈞賢、楊洛婷，因為覺得捱咗咁多年都不被重視而決定走人。周二（ 16日）下晝，「海鷗」走咗無耐，大台就刮起裁員風暴，總經理李寶安宣布即時炒 50人（兒童節目組係「重災區」）！唉，啱啱過咗中秋，年尾難搵工，媽咪姐都戥班被裁嘅員工慘呀。

大台話就話廣告收入差、盜版影響同埋新免費電視台加入令經營成本增加，所以要裁員去「提升效率」喎。嗱，睇番佢早前公布嘅中期業績，係就係差過之前，但都賺成 7億咁都仲要裁員？查實大台不如對班員工多啲關心，搞好啲製作，挽救番啲收視，自然多番廣告啦。

炒人重災區

大台兒童節目《放學 ICU》嘅 12位幕後人員，只有一位製作統籌可以留低，其他都收到「大信封」，包括出年退休嘅資深監製曾廣平亦「難逃一[!84B2]」。

今次成為裁員重災區嘅兒童節目組其實幫手孕育咗唔少巨星藝員，除咗大家熟識嘅星爺、朝偉。望下張相，朱茵同黃智賢都做過㗎！難怪譚玉瑛姐姐同麥包（麥長青）講起舊同事被裁都幾傷感。

大台真係正值多事之秋，周三（ 17日）罕有地為誤播一啲未經證實嘅傳聞片段，登報兼喺《東張西望》同向華強夫婦道歉。

視后楊怡　感嘆

覺得好可惜，《閃電傳真機》同《放學 ICU》好有代表性，希望被裁嘅同事喺外面有更好發展，最重要係公司俾足補償。

麥包　看透世情

裁員當然唔係一件開心嘅事，但希望大家用正面態度去面對。冇擔心會裁到自己，對自己有信心，總之點都唔好放棄。

譚玉瑛姐姐　贈言舊同事

我哋打工仔點會明白公司嘅嘢。咁多多少少係有唔舒服，覺得可惜，始終都喺呢度（兒童組）成長。但無人 sure一間公司會請你一世，人係靠自己最穩陣！

亞視暗開刀

亞姐黎燕珊　欷歔

以前亞視係少林寺。咁後生仔捱吓係應該，有名先有利。但唔係個個都可以帶錢打工，依家咁樣（零底薪續約）點追尋夢想呢？好欷歔！

大台裁員，亞視又點會「執輸」？啱啱就傳出未知 11月續唔續到牌嘅亞視推出劃時代嘅「零底薪續約」計劃，逼藝員變散工。咁執行董事葉家寶就解釋係改合作形式啫，話有啲現有合約藝員可能唔適合做藝員，會「建議」佢哋做其他嘢，又或者可以 keep住簽亞視做經理人，有 job做亞視照抽佣。 Well，咁咪即係變相裁員同減薪囉！

慘在政府講到依家，都未引入多幾個真正有心搞製作嘅免費電視台，一班藝員無得揀，局做！而媽咪姐同大家一樣，愈嚟愈覺得無嘢好睇，嬲爆呀！

鍾意就快D Share啦！

下一篇 》