[FACE 381] 女主角 翠如 BB入雪櫃 陳凱琳蔡思貝玩晒 翠如,蔡思貝,陳凱琳,凱琳,黃翠如,MF,

陳凱琳條件得天獨厚，最緊要有觀眾緣，唔似今屆冠軍邵珮詩咁個個踩。網上圖片

真面目

女主角　翠如 BB入雪櫃　陳凱琳蔡思貝玩晒

大台啲家庭劇講權力鬥爭，例牌最慘就係啲宮女，好似翠如 BB由有線小花上到大台花旦，本來大條直路，但因為珍姐同余詠珊嘅高層內鬥，搞到𠵱家坐冷板。

翠如 BB失寵，其餘啲一綫花旦又嗌離巢。冇人情況下，上年兩位港姐冠亞軍陳凱琳和蔡思貝最受惠，入行一年已連拍多劇，兩姐妹下半年大台玩晒！

連拍三劇

23歲陳凱琳上年以 17萬選票當選港姐冠軍，靚樣加富貴家境，天生屈機條件，大台當然唔會浪費。去年當選冇耐已拍首套劇集《商戰》，拍住黃浩然，同以往啲冠軍港姐要白做一年所謂親善工作好大分別。之後即拍《 4個女仔 3個 bar》做女二，戲分仲多過捱咗 10年嘅女一唐詩詠。最勁係《 4》劇未拍完，上週四（ 4日）又為新劇《張保仔》開工，劇中更加係女一拍住陳展鵬。由未做過戲，到做女一唔使一年就搞掂，上位速度仲快過翠如 BB。

今年港姐冠軍邵珮詩，雖然有 16萬選票，但由於最後三強位置，由評判選出，而唔係觀眾投票，被人質疑係有篩選嘅選舉，人氣當然冇陳凱琳咁勁

《 4個女仔 3個 bar》為陳凱琳第二套劇，劇中拍住張繼聰，戲分仲搶過女一唐詩詠。

唔使一年陳凱琳已經升做女一，新劇《張保仔》拍住陳展鵬、黃浩然。冇錯，又係呢兩個做男主角。網上圖片

速做女一

陳凱琳上位快，同期港姐亞軍蔡思貝亦冇執輸。除咗綜藝組狂做主持外，拍劇亦追貼陳凱琳。蔡思貝同陳凱琳一樣，首套作品係《商戰》。但之後即喺《八卦神探》孭飛做女二，仲同劇中鄭俊弘拍到傳緋聞，兩人超市廣告又播足幾個月。現忙拍嘅《衝線》，已經做女一，劇中同羅仲謙談情。睇嚟呢兩姊妹鬥完港姐又要喺花旦位度再鬥！

鬼妹仔蔡思貝，不拘小節，亦係呢種性格令佢上位。拍劇冇停手，之前被本刊拍得佢露底踩單車。

蔡思貝第二套劇為《八卦神探》（前名《牛頭愛搭馬嘴》），同劇中鄭俊弘做一對。二人傳過緋聞，仲一齊拍廣告。

拍完兩劇後，蔡思貝即升呢做女一。現忙拍《衝線》，劇中拍住羅仲謙、沈震軒，大台終於有啲新鮮感喇。網上圖片

選完港姐冇耐，蔡思貝即拍劇，喺《商戰》中拍住剛上一綫小生蕭正楠，擺明畀位佢上。

花旦去哪兒?

大台用人好聽啲就叫捧你，難聽啲就叫做殘你，講真未必係女都肯同你連踩 36小時，姐仔輪住走，大台唔發掘新血唔掂。

陳茵媺湊仔

原先開始站穩女一，但因為要湊 B，大台想佢做，佢都唔得閒理。

楊思琦放棄

年中開始離開大台外闖，要拍劇做女一比較難，反而北上密做登台仲好賺。

胡杏兒走人

現時大台女一花旦，不過合約到下年中約滿，據知續約機會不大，梗係北上賺人仔好過

苟芸慧 hea做

原本大好前途，亦係女神級數，可惜暴肥同緋聞搞到女神停晒工。

鍾意就快D Share啦！

下一篇 》