[忽然1周 1002] 秋季日劇 型男大作戰 竹野內豐神化的士佬 竹野內豐,MW,

喺新劇入面嘅竹野內豐，一改以往官仔骨骨兼 cool爆形象（小圖），飾演愛管閒事兼能穿越回到過去嘅的士司機，令觀眾耳目一新。

亞熱帶

秋季日劇　型男大作戰　竹野內豐神化的士佬

夏季日劇落幕，木村拓哉套《 HERO 2》最尾雖然同《 HERO》嘅 36.8%差得遠，只得 22.9%，但跟同期劇集比，都算執番身彩。話咁快，今年秋季新一輪日劇又出籠啦﹗今季劇集競爭更為激烈，可以講係型男空群出動，有竹野內豐、織田裕二、小栗旬，再加一眾美魔女，如宮澤理惠、深田恭子、綾瀨遙，粒粒都係大星。不過最受矚目嘅，非竹野內豐莫屬啦﹗事關佢今次喺新劇演一個擁有「不可思議」能力兼諸事八卦嘅的士司機，跟佢以往深情公子 look大相逕庭；織田裕二嘅翻版半澤直樹亦值得期待。食得泡菜多，係時候轉吓口味，食吓醃蘿蔔啦﹗

其他影片：>>Cool男轉型　竹野內豐勁搞笑

《最好的選擇》

竹野內豐制服誘惑

好睇指數：★★★★★

富士電視台十月份月火劇《最好的選擇》，搵咗兩年冇拍劇嘅型男竹野內豐飾演非一般的士司機。

劇集內容屬於單元性質，竹野雖則外表夠 cool，事實卻係口水多過茶，而且超鍾意食甜嘢嘅怪雞的士佬。佢每次遇到失意嘅搭客，就會先同人講一輪耶穌，然後再帶佢哋穿越時空，回到過去，重新選擇正確嘅路。值得一提係，每集嘅乘客都會由一線演員演出；而竹野個的士佬造型，着晒老西打晒呔，再加對白手套，嘩，型到呢﹗所以對竹野迷嚟講，呢個真係最好的選擇。

首播時間﹕ 10月 14日

《最好的選擇》係搞笑藝人升野英知（左）編劇，今次亦會喺劇集客串，飾演咖啡店店長。

劇集屬單元形式，所以每集都有唔同演員演出，好似第一集就有小西真奈美（上右）同安田顯，第二集則有仲村亨飾演落泊麻甩。集集都有大量紅星登場，抵睇

《信長協奏曲》

小栗旬又玩穿越

好睇指數：★★★★

潮流興玩穿越，韓劇玩完到日劇。小栗旬喺《信長協奏曲》入面，由現代穿越到古代。內容講小栗旬飾演讀書唔成、尤其係對歷史一竅不通嘅宅男高中生，卻突然穿越到古代，見到同自己一模一樣嘅織田信長，仲要代替身體虛弱嘅信長做統一天下嘅大事。除咗小栗旬一人分飾兩角外，仲有柴咲幸，好有睇頭嘅劇集。

首播時間﹕ 10月 13日

啱啱做咗老竇嘅小栗旬，今次喺《信》劇分飾現代版宅男男生三郎及戰國時代嘅織田信長。

小栗旬拍《信》劇除咗要着丁字褲露股外，仲要俾柴咲幸兜巴星，認真犧牲大咯！

當紅小生向井理喺《信》劇飾演嘅恒興，因父母都係小栗旬家臣，所以跟小栗旬「青梅竹馬」，長大後更係小栗旬身邊唯一最信任嘅人。

《咕咕貓》

宮澤理惠玩貓貓

好睇指數：★★★★

近年變得積極嘅宮澤理惠，繼電影《紙之月》後，又接拍電視劇《咕咕貓》。劇集係改編同名漫畫，而且 08年時，亦由小泉今日子同上野樹里拍過電影版，獲得好評。今次劇集宮澤理惠同樣扮演愛貓畫家，剪咗短髮嘅佢，夠晒 cutie﹗而劇入面嘅貓貓又好可愛，真係人同貓一樣吸睛。鍾意貓嘅人絕對鍾意呢套劇。我話嘅﹗

首播時間： 10月 19日

宮澤理惠飾演嘅少女漫畫家，因為自己養嘅貓死咗，搞到唔開心，之後意外遇到有病嘅流浪貓，而將佢養大。

《股價暴跌》

織田裕二抄半澤博翻身

好睇指數：★★★★

織田裕二近幾年嚟，星途完全唔順，為求翻身，接拍 WOWOW新劇《股價暴跌》，劇集開宗明義翻抄《半澤直樹》。內容講織田裕二飾演完全唔受組織慣例感染，忠於自己信念嘅孤傲銀行審查員，希望幫助陷入經營危機及面對恐怖襲擊嘅企業，跟反對融資嘅高嶋政伸對立。 46歲嘅織田喺劇中演出，好有《跳躍大搜查線》影子，織田就有望靠《半澤》餘威挽頹勢。若然大家對《半澤》仍未厭倦嘅話。

首播時間﹕ 10月 19日

《股價暴跌》亦係《半澤直樹》嘅池井戶潤編劇，近年人氣不振嘅織田裕二喺劇中飾演熱血銀行職員，希望食《半澤》水尾求翻身。

《股》劇入面有幾場爆炸動作場面，就被激讚話勝過《半澤》。

《女性決不容許》《今天不去上班》

深田律師 Vs綾瀨遙乾物女

除此以外，深田恭子以律師為主題嘅《女性決不容許》（ 10月 21日首播），決戰綾瀨遙擔正、改編少女漫畫嘅《今天不去上班》（ 10月 20日首播）。深田喺《女》劇入面，飾手法強悍出名嘅法庭律師。而綾瀨遙喺《今》飾 33歲、從未拍過拖嘅 OL。又開正乾物女嗰瓣。

好睇指數：★★★

深田恭子演法庭律師，跟戲中飾演名流律師嘅寺島忍拍檔，雙劍合璧。

好睇指數：★★★ 1/2

劇中 33歲綾瀨遙同 25歲福士蒼汰（右）發生姐弟戀。

鍾意就快D Share啦！

下一篇 》