靚抽王
高登男女神再崛起
上高登討論區睇高登巴打吹水講古，一向都係了解民意嘅最佳途徑，正所謂識睇一定係睇高登。近幾年高登巴打都會選出佢哋心目中嘅男神女神，不過今年有啲唔同，雨傘佔領事件後，高登巴打再次出手，要重整高登男女神榜！究竟邊個會得高登巴打嘅垂青，邊個又會令到巴打們唾棄？去片！
冊封為永遠的男神——黃子華
子華喺近日嘅棟篤笑《唔黐線唔正常》度，力撐示威人士和平同理性，寸爆政府唔與民為善，仲含淚講咗句「我哋香港人係光明磊落嘅」，網民讚爆佢，有高登巴打更將佢捧為「永遠男神」。查實佢為人幽默、有智慧、出口成金句、 50歲都仲 keep到……已經係不爭嘅事實，不過原來有好多關於子華嘅嘢，好多人係唔知嘅。
你所不知道的……關於黃子華的 5件事
1.曾被張達明比下去
黃子華貴為香港第一個搞棟篤笑嘅人，曾經帶挈張達明同自己一齊搞棟篤笑，但係曾經有一段時期，張達明反而比佢紅！喺大台電視劇《狀王宋世傑》入面，張達明擔正，子華當反派，就曾經令男神灰灰哋。
2.電影票房仆直
子華拍過 51套電影，大部分票房都唔太好，甚至係差。呢樣嘢一直令男神感到遺憾，佢亦曾經喺棟篤笑入面自嘲，自導自演嘅《一蚊雞保鑣》，係「自己死喺自己手上」。
3.爛鬼片王
曾經拍過多部鬼片嘅子華，曾經以《二月三十》獲得金像獎最佳男配角提名。但係佢拍嘅鬼片質素參差，子華曾經喺棟篤笑入面講述自己飾演一隻揸住電風扇橫行嘅「阿柏奇直升機鬼」，認為自己都唔知做緊乜鬼。
4.留有案底
男神曾經因為同朋友喺相思灣偷搭他人嘅艇仔出海，所以留有案底同守行為，做錯嘢都搞笑過人，果然係幽默人生。
5.曾擔任亞視晨早節目主持
子華曾經同巴斯光年同洪朝瘋擔任亞視《晨早直播室》嘅主持，據說佢當年每日都係未瞓醒就做節目，有時甚至連牙都未刷，係最有清晨氣息嘅清晨節目主持人。
趙學而 順利過關成為女神
話說早幾日學而有個朋友不斷喺社交網站煩住佢，叫佢唔好支持佔領行動，點知俾學而姐姐秒殺：「你朋友我係一個演員喺香港兩年無發市呀，作為朋友你有無問候過我有無飯開呢？你知唔知點解我無飯開呀？係因為特區政府嘅政策呀！」高登巴打對於學而姐姐嘅義憤同義舉都十分欣賞，齊齊力撐，讚佢份人有義氣之餘，唱歌又好聽。所以話講番句人話，其他優點都俾人睇到，何樂而不為呢？
永久除名名單：有人歡喜有人愁，有人榮登寶座，有人名落高登……
官恩娜
日前官恩娜喺臉書 post咗幅搭地鐵嘅相，表示：「十五分鐘的車程！用了我兩小時…一整天都在遲到！我真的很哭！」網民一致鬧爆，有人話佢搭錯車，有人話荃灣去柴灣都只需 1粒鐘，總之就對佢搭兩個鐘地鐵喺度呻嘅態度，非常不滿。最後佢澄清，佢唔係話搭地鐵用咗兩個鐘喎。唉，佢可能真係唔係咁嘅意思，不過就算係咁，都唔係呢個時候講呢啲話吓？所以佢唔係人格破產，係智商破產先真。
吳若希
吳若希同官恩娜一樣，喺臉書度衰多口，埋怨示威集會令小巴停駛，影響市民正常生活，結果當然係被巴打們唾棄兼永久除名高登女神。另外若希 BB話自己「想回去台灣」，更觸動比愛港力更愛港嘅高登巴打神經，力斥：「大陸妹始終係大陸妹」……都係嗰句，守得住人格嗰一關，都守唔住 IQ呢一關，講嘢經大腦
熱烈地熱烈地唱
同你數盡今個星期最喜氣洋洋嘅娛樂圈喜事！喜氣洋洋~~
|
鍾意就快D Share啦！
|
|
|