價值百五萬的波子被撞凹了一大忽，但蘇永康仍然保持笑容， EQ極高。
探熱針
代客泊車撞凹波子 蘇永康： Maserati鋼水好啲！
正忙於準備十二月再婚的蘇永康，上星期六（九月二十七日）還帶埋未來老婆馮翠珊（ Anita）及康媽到中環 Escada揀晚裝，點知樂極生悲，蘇永康的「二廠」、價值百五萬的波子坐駕，被酒店代客泊車職員撞凹，難得準新郎仲可以笑笑口同酒店職員交涉，好事近，果然唔同啲。
警察到場
上星期六（九月二十七日）黃昏六時，蘇永康同未婚妻 Anita加埋準奶奶去中環 shopping，為十二月二日舉行的婚禮到 Escada揀晚裝，其間，蘇永康將價值百五萬的 Porsche Panamera S，交託置地文華東方酒店代客泊車職員看管；未幾，有兩個警察接報到場，原來代泊職員將蘇永康的坐駕，撞向停泊在前面的瑪莎拉蒂 Granturismo S，結果，蘇永康的波子右邊車頭燈位置被撞凹，瑪莎拉蒂的車尾亦撞花，酒店職員於是報警處理。
未知心愛「二廠」出咗事，蘇永康繼續開心 shopping，見到鏡頭笑容滿面，記者通知他其坐駕被撞凹時，準新郎仍表現淡定。「可能平時揸車唔小心，刮花啫！（新整㗎，仲有差人處理緊。）等我返去睇吓先。」蘇康說。
無奈苦笑
返到事發現場，蘇永康離遠見到自己架波子右邊車頭「毀容」，一邊拍住心口，一邊苦笑望住酒店職員：「嗚嗚……啊你話點好呢？即係你話點好呢吓？」酒店職員上前向他解釋事發經過，蘇永康一味「啊」、「哦」，又問職員：「啊，咁個責任係邊個負呢你估？你認為個責任係咪你哋負呢？」
之後蘇永康向職員索取酒店負責人聯絡方法，準備向有關方面索償。
「因為佢哋（酒店職員）撞，佢俾咗個報案 number我，我要去 check番先，我睇佢哋會賠啩，咁大間酒店……」蘇永康說。
無妄之災，臨走前，蘇永康一臉無奈再摸吓「二廠」，又行埋去探望被波及的瑪莎拉蒂，見對方只是輕微撞花，蘇永康更加無奈：「 Maserati鋼水好過波子。」
未必賠
根據保險公司條款指引，車主將坐駕交給代客泊車，車主需要承擔風險，原則上當車匙交給泊車員時，已代表授權對方駕駛，一旦發生意外，車主只能向自己的汽車保險公司申請索償。不過車主若能證明泊車員駕駛失當，則可以循民事訴訟要求賠償。
代客出事
明星配名車，但代客泊車技術參差，撞花時有發生，大鑊到失車，都有！
|
鍾意就快D Share啦！
|
|
|