老公唔生性，阿 Yu惟有復出賺錢養兩個女，頭炮為美容院拍廣告，即大騷長腿吸客。
封面
玩厭被撇 Ruby死纏人渣恒 趙頌茹：祝佢好運！
上月因打傷老婆趙頌茹，被輕判守行為 18個月的 30歲「渣男」周永恒，執身彩唔使留案底，照計應該生性做人。法官俾晒機會，但周永恒唔識死，上週二（ 23日）又發癲，跑去阿 Yu位於屯門的外家搞事，期間失控狂爆粗，更向外母吐口水，事後趙父報警，警方要出動盾牌拉走周永恒。
死性不改，阿 Yu對結婚 4年的賤男已經死心，反而小三 Ruby劉依靜即使俾人玩厭狠撇，仍然樂於死纏對方。一個願打一個願捱，難怪甩身阿 Yu大方讓愛，衷心同小三講句︰「祝佢好運囉！」
家暴偷食連衰兩樣，自認「人渣」的周永恒雖然口口聲聲喊住認錯，但人前人後兩個樣，毫無悔意的他，繼早前同小三 Ruby飛去新加坡風流快活後，上週又忽然發作，大鬧老婆趙頌茹娘家，完全冇挽救婚姻之意。
病房食足 3餐
上週二（ 23日），周永恒聲稱女兒生日想見面，衝上阿 Yu位於屯門的寓所要求見女，但期間表現失控，狂搖鐵閘喪爆粗，更向外母吐口水大嗌：「 X你老 X！開門！你哋害死我兩公婆。」
周永恒的癲喪行為令屋內冇人敢開門，兩個女兒亦被父親嚇呆，最後趙父更要報警求助。警方出動盾牌打算帶周永恒返青山警署，但佢嗌暈拒絕落口供，最後被送往屯門醫院留醫，週五（ 26日）再轉到伊利沙伯醫院，現時仍然留在羈留病房受警方看管，據知報稱發燒又頭暈的周永恒，在病房非常好胃口，食少餐都嘈喧巴閉，護士都怕咗佢，暫定 10月 3日上庭受審。
奶粉錢 10月湧住嚟
阿 Yu復出頭炮幫美容院做代言，話咁快搵到 6位數酬勞，不過養大一個小朋友要 400萬，𠵱家阿 Yu要養兩個，真係懶少少都唔掂，好在阿 Yu形象唔錯，單計 10月已經大把工作湧住嚟！
•「風雨蘭關注婦女性暴力協會」活動× 1
•服裝廣告× 1
•商場演出活動× 1
周母沒收電話
決意離婚，打算獨力湊大兩個女的阿 Yu，對周永恒已完全死心。反而小三 Ruby竟然對賤男唔肯放手，除了不斷滿足對方的奇怪性癖，早前亦孖住去新加坡度假 happy，又落力為佢搵工開，做足「經理人」本份！
女方無意斬纜，不過周永恒竟然嫌 Ruby小三身份曝光，以「唔係偷情唔刺激」為由，狠撇 Ruby，更絕到唔聽電話唔覆 WhatsApp，真正𡁻完鬆。據知周母亦不滿 Ruby搞到阿仔妻離子散，日前沒收了周永恒的電話，只在探病時俾佢篤兩篤，防止小三再次發功騷擾阿仔。
而事發一直潛水、失蹤 27日的 Ruby，上週六終於在其大窩口邨住所現身，晚上 6點，化行妝的 Ruby由屋企落樓，發現記者後兜路到天橋，記者問她是否仍和周永恒一齊， Ruby只搖一搖頭，對本刊的問題一概封口，之後便上的士離開。
Yu：「唔想再提佢哋！」
一度因婚變令體重跌至 90磅的阿 Yu，獲一間美容院支持，以 6位數請佢做代言人，上週四（ 25日）廣告出街， Yu大騷長腿，努力賺錢養家。阿 Yu現時積極為 4歲信希及 2歲愛希搵學校，早前去過太古城及康山搵資料，打算為兩個女報讀國際學校，遠離悲情城市天水圍。
阿 Yu週一（ 29日）接受本刊電話訪問，樂得同一對奸夫淫婦割蓆，她說︰「唔想再提佢哋！關於佢哋所有事，我唔想再講，（ Ruby死纏周永恒喎？）咁祝佢好運囉！」
梁永鏗律師：最高刑罰監禁 5年
上次係因為佢自簽守行為 18個月，但再度騷擾太太，控方就可以提證供正式起訴，可能係判刑或者係社會服務令，但今次喺短期內犯同一罪行，刑罰就會加重，最高判罰係會監禁 5年，係要分兩條罪審理。
|
鍾意就快D Share啦！
|
|
|