胡杏兒唔續約 再挫無綫
又一位重量級花旦逃離無綫！下月踏入35歲的胡杏兒明年初與大台約滿，貴為視后的她在殼王陳國強入主後，由當家花旦慘變失寵視后，今年更被公司「擺歪」投閒置散，不但在台慶亮燈冇影，甚至連台慶劇都冇份，至今已年多沒新劇出街，雖然拍好兩部劇集，卻被安排在12月的炮灰期播出，擺明無緣再競逐爭視后，據知，心灰意冷的杏兒決定唔續約，再挫無綫！
胡杏兒在99年港姐奪得季軍加入無綫至今已15年，於11年憑劇集《萬凰之王》首封視后，曾經坐穩當家花旦風光一時的她，卻於無綫易主由陳國強揸弗後，慘被「擺歪」淪為失寵視后。相反，先後殼王愛將徐子珊和高海寧，卻被力捧劇接劇出街，新寵高海寧更有份在今年台慶亮燈壓軸表演，反而視后杏兒無影無蹤。據本報收到消息，被投閒置散的杏兒對大台心灰意冷，決心於明年初約滿後與無綫割席，北上賺人仔，繼林峯、陳法拉、鄧萃雯等重量級小生花旦離巢後，再度挫弱無綫聲勢。
■胡杏兒昨日出席手錶品牌活動，坦言有跟香港和內地的公司傾合約。
■杏兒（中）連續7年擔任該手錶品牌大中華區代言人，在內地受歡迎的她難怪想離開大台另謀高就。
■杏兒上一部播出街的劇集，已經是去年7月的《衝上雲霄II》。
電視圖片
新劇變炮灰
其實，杏兒被大台冷待有迹可尋，據消息指，杏兒於大台換老細後，失寵的她雖是視后都無面畀，慘被剔出力捧名單，今年雖然拍了4部新劇《醋娘子》、《陪著你走》、《巾幗梟雄之諜血長天》及《梟雄》，但4部新劇遲遲未出街，其中《梟雄》更是掛名女主角，該劇由黃秋生、湯鎮業、黎耀祥的男人戲孭飛，杏兒只屬花瓶陪襯角色，甚至連官方月曆上都只佔一小角位置。
杏兒上一部出街的劇集，已經是去年7月播出的《衝上雲霄II》，距今已年多時間沒新劇出街，不但今年台慶劇冇份，被王祖藍《老表，你好hea！》和黎耀祥《名門暗戰》取代，就算暫定出街的兩套新劇《醋娘子》和《陪著你走》，卻被安排於炮灰期12月播出，擺明令杏兒無緣再爭視后，難怪令她對公司心灰意冷。據知情人士透露，杏兒眼見舊同事離開大台後，在內地撈到風生水起，她有感在大台已15年，近年角色被局限沒突破，不想再蹉跎歲月，想出去闖天下。
昨日杏兒到屯門出席手錶品牌發佈會，被問到與無綫的合約問題，她說：「仲有啲時間，傾緊續約，自己年紀唔細要諗清楚，做咗好耐嘢，係時候諗清楚自己想點要啲乜。其實我冇乜要求，但唔想畀自己太大壓力，想有啲時間。」問有否其他公司斟洽？她坦言：「香港、內地都有，都係傾緊，𠵱家錢唔係最重要。」是否想要時間搵男友？她笑說：「呢個真係好緊要。」會否改簽部頭？她說：「所有都要傾。」
■陳國強愛將高海寧（右）和徐子珊劇接劇出街，氣勢盛過視后胡杏兒。資料圖片
積極搵男友
對於無綫員工聯署反暴力被高層余詠珊打壓，杏兒說：「係咪真㗎？點都好啦，暴力事件冇人想見到，唔想大家冇咗份工，每個人都有自己訴求，唔可以話邊個啱邊個錯，我梗係希望社會開心，每個人都有工作，𠵱家可能係一個過程要經歷先可以拎到平衡，希望大家都可以快啲拎到平衡。」杏兒說完即透大氣，做出抹汗手勢。而下周生日的她，願望是越大越靚，問有否追求者？她說：「之前都係誤傳，有人追但唔適合，要有感覺，現單身OK，唔會為有男友而拍拖，不過自己都會積極啲。」對於舊愛黃宗澤傳有新歡，她劃清界線說：「呢件事唔應該再問我啦，有女友好正常，最重要大家開心。」
採訪：譚倩宜
攝影：陳慧安
潘紹聰X柳俊江
星期一至五 晚晚「搵鬼睇」
http://hk.apple.nextmedia.com/horror
【三個粉絲去首爾】
追星實錄，即上韓劇讀：http://hk.apple.appledaily.com/kstar
|
鍾意就快D Share啦！
|
|
|