[忽然1周 - 1009] 輸人唔輸陣 賭王發燒甩底 四太照開 P慶祝 賭王,MW,

生日先嚟病，認真掃興。不過四太好識 do，帶咗個靚蛋糕去醫院，奉送玉腿同肉嘴，賭王都當堂精神晒！

媽咪姐

輸人唔輸陣　賭王發燒甩底　四太照開 P慶祝

話咁快已經踏入冬天，差唔多時候慶祝聖誕呀新年啦……咦，咪住，大家唔好唔記得，仲有賭王何鴻燊生日。

媽咪姐冇咁矜貴，冇乜機會參加呢啲富豪壽宴，不過年年睇到賭王游走四房之間，嗰種喜悅、嗰種「人在江湖身不由己」嘅味道，仲有各房大鬥法呢，真係每年都令媽咪姐食唔少花生。

今年賭王 93歲大壽，本來都好熱鬧㗎，可惜佢 body唔爭氣，突然發燒病咗。

咁就弊嘞！訂好的酒席，約好的 party腳呢？四太搽定 lip gloss嘅「肉嘴」又何去何從？

大家唔使驚，古語有云：「 The show must go on」。今年搶到賭王正日生日（ 11月 25日）嘅四太，堅持「齊歡暢，同慶賀」，繼續喺上環澳門賽馬會為老公開 Birthday P。即使主角抱恙缺席，四太依然拉埋一班仔女盛裝出席，幾咁有氣勢！

古仔去到呢度仲未完㗎！當晚二房率先向傳媒發布賭王生日相，搶番少少鏡。不過四太做事向來滴水不漏，轉個頭即刻出咗段賭王生日 video，同場附送肉嘴、坐大髀、全家福 3張靚相俾大家珍藏。冇咗主角都搞到咁精彩，不得不寫個「服」字俾四太！

溫馨慶生

四太率領仔女賀壽，發緊燒嘅賭王應該覺得好 sweet。

短片發傳媒

四太向傳媒發放嘅 video，只得賭王一個出鏡，大意係祝大家身體健康。

仔女有心思

猷君帶頭將周杰倫嘅〈聽媽媽的話〉重新填詞改成〈聽爸爸的話〉（上圖），超盈則喺 instagram高呼愛爸爸（下圖）。

進擊的四太

賭王只得一個，但就有四房人，點搞先？所以每年爭到同賭王過正日生日，不但係無上光榮，亦係身份象徵。難怪四房人年年爭崩頭，四太更係最主動嘅一個。

2011年　移船就磡

二房率先喺 11月 20日搞壽宴，但翌日三房出招，指賭王身體不適要入院，搞到四房安排嘅壽宴要取消。四太惟有移船就磡，於生日正日去醫院慶祝，並送上肉嘴、大髀，總算攞番個尾彩。

2012年　一早 book定

四太以「一早 book定地方」為由，攞正牌同賭王正日出外食慶生晚飯。既然黃金時段都冇咗，三太惟有 mark實正日晏晝，攞番啲揸拿。

2013年　啅到盡一盡

二太藍瓊纓專程由英國返港，賭王正日生日梗係留俾二房啦。「被安排」提前慶祝嘅四太不甘示弱，前一晚預先同賭王過夜，直至正日晏畫 4點先放人，夠晒癡纏！

二房賀壽慈善最強

二房近年轉趨低調，但每一年賭王生日都不敢怠慢。即使仔女幾咁忙都好，必定抽時間陪老竇捐錢。你哋冇聽錯，係捐錢！賭王於 2001年提出「賀禮捐公益」嘅籌募活動，自此二房每逢賭王生日都會捐款，今年仲罕有見到二太藍瓊纓出席。齊齊整整又有得搶先同賭王慶生，實 happy

二房捐出 200萬港元予公益金，並準備蛋糕同壽包賀壽。平日甚少露面嘅二太藍瓊纓亦有出席。

上一年，二房以同樣人馬捐錢俾公益金。

三房變陣去醫院慶祝

據講三房一早安排喺屋企幫賭王慶生，超雲同超蓮則準備蛋糕，但賭王臨時入院，搞到三太都要變陣配合。周三（ 11月 26日），四太先到養和，三太陳婉珍隨後趕到。有指賭王過兩日就出得院，到時再補祝都未遲。

三太以往都好鍾意喺珍寶海鮮舫為丈夫擺壽宴，不過今年賭王入院，可能遲啲先可以補擺。

冇幾耐，猷啟同超蓮一身運動裝出現。佢哋表示媽咪當晚會留低陪爹哋，星期四（ 11月 27日）則會一家人食 lunch。

周三（ 11月 26日），四太先抵達養和，三太及後趕至，但冇乜講嘢就入咗去探病。

鍾意就快D Share啦！

下一篇 》