北上搵食
在大台 14年，吳卓羲幾乎一出道就是男主角，後憑《衝上雲霄》爆紅，穩站一線小生之列。可惜其後他衰緋聞多，形象差遭公司多次照肺，但屢勸不改，最後更被燉落二線。在大台冇運行，據知下年年中滿約的他，決定唔續約北上搵食。
娛樂喧
不滿大台冷待 吳卓羲鍾嘉欣密謀走佬
曾是一台獨大的大台，隨着近年劇集質素下降，被網民評為「膠劇」，加上被指孤寒、獨裁、欺壓員工，嚇怕一班小生花旦急忙逃出生天。本刊收到消息，還有半年合約的吳卓羲亦打算逃離娘家，疊埋心水掘人仔。
本來一心諗住「做生不如做熟」的吳卓羲，眼見近年不被重用，多次由主角被燉到配角，唔嬲有鬼。至於攞極攞唔到視后的鍾嘉欣，也不禁心淡密謀走佬。眾叛親離，睇嚟大台真係要諗諗計。
人才濟濟的大台不復當年勇，月前連「超級親生仔」林峯也因多番失落視帝而離巢。周一（ 24日）林峯以一億天價賣身英皇，大台更不派記者去採訪其簽約記招。
陳展鵬反超前
眼見好兄弟林峯決心離巢，更泊得好碼頭，吳卓羲亦終於的起心肝諗去向。下年中便約滿的他，今年 3月初曾對外放風：「已經有內地公司斟我，但冇 TVB又點會有我呢？我首選都係無綫。」表現忠心。
大台坐定粒六，與吳傾續約就放軟手腳。早前播出電視劇《叛徒》，男一吳卓羲被大幅 cut戲，戲劇組話事人曾勵珍愛將陳展鵬則獲加戲份。收到風的吳卓羲即刻惟有自救：「男主角呢啲嘢邊分得咁清楚，戲份多唔代表就會突出。」
以為退一步海闊天空，原來打擊陸續有來，吳卓羲眼見陳展鵬早前在新加坡舉行的電視大獎中憑《叛徒》奪視帝，更加酸到出面。而剛於周日（ 23日）在大馬舉行的《 TVB馬來西亞星光薈萃頒獎典禮 2014》，宣傳海報上明明有吳卓羲，但最後他連豬肉獎都分唔到一個。
北上劇酬升 7倍
好彩因為林峯鐵定離巢，大台才加多兩錢肉緊與吳卓羲傾續約。為表誠意，先是安排他夥影帝黃秋生、湯鎮業拍重頭劇《梟雄》，再谷他做男一的喜劇《醋娘子》在下周一出街。知情人透露：「公司安排阿 Ron（吳卓羲）拍《梟雄》，本來係好筍，可以拍住大卡士，但除咗秋生佢哋，仲有黎耀祥同馬明，阿 Ron都唔知係男幾？講《醋娘子》仲嬲，本來公司真係諗住播嚟做傾約條件，因為杏兒同阿 Ron都係差唔多時間完約，咁公司政策一次過可以滿足晒兩個人。但套劇忽然延期播出，搞到阿 Ron冇份角逐今年台慶頒獎禮，你係主角嬲唔嬲！」
據知近年一直有搵人仔機會的吳卓羲，在內地吃得開，每集酬勞穩袋 15萬，是大台 7倍。據知吳卓羲已決定離巢，早前就暗示要努力搵錢：「阿媽嫌間屋太細，叫我買大啲。唉，做仔壓力幾咁大。」
強國熱捧
雖然國語不靈光，但吳卓羲在強國卻出奇地有市場，近年密密拍強國電視劇，儲落不少內地粉絲。每集劇酬亦由原本的十萬加至十五萬，有價有市。
冇視后嗌走
大台冇誠意留唔到人，連忠心耿耿的鍾嘉欣亦遭「逼走」。據知嘉欣 BB在大台一直得各大高層歡心，但近年她多次提名視后，都與獎項無緣。直至近日播的《飛虎 2》，嘉欣 BB飾演亦正亦邪女警，演技備受讚賞。可惜有傳今年視后將會是回巢佘詩曼的囊中物，只要阿佘出席台慶頒獎禮，就能擸獎。而阿佘在周日的《 TVB馬來西亞星光薈萃頒獎典禮 2014》亦率先勇奪視后，開心得宣布會出席台慶:「到時我會着靚啲！」收到風的鍾嘉欣似乎已打定輸數。
失落視后，連歌唱事業都受威脅。本刊收到消息，屬「星夢娛樂」一姐的嘉欣 BB，本來是唱片公司揸 fit人何哲圖愛將，但有傳他老婆余詠珊不滿只捧嘉欣 BB，於是吩咐他要另捧吳若希。雙失的嘉欣 BB近日另謀出路，據知黃柏高（ Paco）亦有意收留她，捧她拍電影兼繼續出碟。
大台愛將買少見少，加上港視來勢洶洶，令大台收視明顯下滑。內外夾擊，大台勢危！
|
鍾意就快D Share啦！
|
|
|