阿佘企花旦中間靚位，隔籬係《老表，你好 hea》嘅郭晉安，就快完約嘅胡杏兒，企位靚過馬國明同徐子珊，大台果然出盡誠意留人。
同你吟一吟
節目巡禮 大台放生胡杏兒
就算大台小生花旦一再流失，一年一度嘅節目巡禮，無綫點都會 call齊全台藝人返公司，招呼客戶老細，幫手拉客。
邊個可以企第一行中間位，往往代表佢响大台嘅地位。當日能夠霸到好位，有陳豪同佘詩曼，而盛傳明年初滿約，就會同無綫分手嘅胡杏兒，繼續有份企第一行，阿佘隔籬再隔籬，只係隔咗個郭晉安，算係靚位；反而响台慶劇《名門暗戰》孭重飛嘅胡定欣，係就係第一行，不過大斜角靠邊，枉費佢花功夫大 deep V現身。
節目巡禮亦係花旦鬥秒殺戰場，不過今年嘅長腿同事業線能見度，錄得有史以來最低。以往有肉唔怕晒嘅長腳蟹呂慧儀，做咗媽咪加上未完全修身，打扮只能夠保守，至於「殼王」新寵高海寧，雖然條裙前面係大 V，不過心口加條三角形大鑽石鏈，露咗等於冇露。
高 Ling遮遮掩掩，至於周身肉嘅苟姑娘苟芸慧，貼身魚尾裙晚裝將水桶腰昇華到另一個境界，連早已經放棄減肥嘅欣宜，都 fit過佢囉！
|
鍾意就快D Share啦！
|
|
|
