【自爆七月已提親】王祖藍當天發誓：我係未求過婚....
2014-11-25 22:47:00
王祖藍斬釘截鐵表示，從來未求過婚。
王祖藍出席新戲首映禮，講到佢有份主演嘅劇集收視下跌，而大台台慶當晚佢向李亞男當眾求婚，亦對台慶收視無助，王祖藍今晚死撐話：「我又唔望唔到喎，唔肯定（劇集）收視幾多，但網上點擊好高，出街好多人都話有睇，仲開創咗後生仔觀眾，朋友阿媽都話追，點擊係最高。」
係咪港視開台打擊收視？祖藍表示：「知己知彼啦，我唔知佢哋播放時間係點，係咪好似盒仔嗰啲呀？如果係就唔會直接影響，電視係另一樣嘢，有機會都會睇人哋劇，裡面有自己尊重嘅演員，暫時未有時間睇，『老表』都未有時間睇，日日飛。」
咁有冇時間搞婚禮？佢話：「都要搞，準備緊，落實明年2月14日喺教堂行禮，地點係九龍城，第二日（15號）喺迪士尼擺酒，教堂嗰度坐到4千人，應該夠使。」
至於印咗喜帖未？佢話未Design，但叫咗王菀之男友Eric 幫佢搞Design，個個見到佢都叫佢請（飲），但驚唔夠擺，迪士尼最多擺60幾圍，而伴郎伴娘未定。
另外，王祖藍表示拍完Running Man，啱啱返港，未詳細傾（婚禮），地點要Book咗先，問到預幾錢結婚擺酒？佢話：「真係唔知，錢呢啲唔好理佢，最緊要另一半﹑父母同埋嚟玩嘅人開心，錢就唔緊要。」
問到台慶當晚係咪坐定笠祿會求婚成功，因有傳佢之前已向李亞男求婚？祖藍就斬釘截鐵表示：「我夠膽當天發誓，我（之前）係未求過婚，我諗講嗰啲朋友，應該唔知結婚係乜事，如果結過婚嘅人會知道，唔會求咗婚先傾結婚囉﹗」
咁係咪已有共識？佢話：「我好耐之前已經同大家講，我係談婚論嫁，但對女仔嚟講，唔會求咗婚先傾結唔結婚，好似就算開咗Party，都想知道份禮物係乜，所以一定未求婚嘅，之前未正式同對方提親，就算有共識，都要阿男父母首肯，要傾下婚禮想點樣先，就算個女仔預咗嫁你，都想知有乜驚喜求婚，我諗講嗰班朋友仔唔清楚。」
咁迪士尼擺酒係咪一早Book咗？佢話：「一路有傾，但自己唔可以太遲覆，上個月先Book，但知道其他人要年幾前先Book，不過自己要守秘密，唔Book住，但有啲嘢唔可以拖。」
佢又笑言揀情人節結婚除咗好浪漫外，仲又可以慳返：「兩個日子同一日，七月時已提親，同對方父母傾過，自己喺加拿大提親成功，當時打畀自己媽咪，第二打畀獎門人（曾志偉），佢好高興，同我傾點搞，我一路未諗到求婚有幾驚喜，所以拖到咁忟水。」
祖藍喺台慶當晚，當眾向李亞男求婚，但之後爆出唔少是非。（電視圖片）
（電視圖片）
（電視圖片）
王祖藍表示七月時已經向李亞男家人提親。（攝影：陳志嵐）
王祖藍鐵定於明年2月15日迪士尼擺酒。
佢話仲未印喜帖，會勞煩王菀之男友負責design。
|
鍾意就快D Share啦！
|
|
|