導演：黃國強、編審：黃偉強
哥哥黃國強（左）在大台拍過《烈火雄心 III》、《畢打自己人》等，細佬黃偉強作品則有《法證先鋒 III》和《義海豪情》等。
爆 Like王
《選戰》真兄弟劇透
HKTV顛覆咗睇電視習慣、《選戰》就顛覆咗香港電視劇，唔只鮮有地開宗名義講政治，仲撞正普選特首、公民抗命、提名權等時下話題，所謂時勢做英雄，局勢卻造就咗《選戰》 hit爆，甚至有網友話連廣告汁都要撈埋！
《選戰》播咗兩集，口碑如潮，導演黃國強(KK)和編審黃偉強(Benny)是兩兄弟，喺大台工作近廿年，來到 HKTV才首次合作。原來他們提出拍《選戰》時一度嚇窒王維基，兩兄弟仲話如果李心潔唔拍維基會攔置套劇，由話題到選角都冇轉彎餘地！
F：《 FACE》 K：導演 KK B：編審 Benny
F：《選戰》撞正雨傘運動，有冇補拍或者改過對白劇本？
K：上年寫劇本本來想講政府內部同黨派嘅角力，但發覺拍唔到，因為去唔到立法會拍喎，又冇辦法入到政總， Benny建議寫在野嘅選舉啦。
B：拍嘅時候有啲資料性嘅嘢要改，例如公布咗提名委員會要過半數至可以入閘，我哋估錯咗唯有改啦；唔影響劇情嘅，不過李心潔、郭峰都有講「要爭取幾多張票先入到閘呀」呢啲就要配音或者補拍番。
F：選特首題材敏感，有冇阻滯？
B：記得寫過一場戲關於中聯辦，係講宋漫山（廖啟智飾）見王主任（中央官員），王生（王維基）問：「點拍呀？會唔會太敏感呢？」王生話中聯辦個場景好難搞喎，佢話：「你諗清楚」
K：佢冇話唔拍，佢話：「不過有咩事你都要負責㗎喎！」
B：但如果香港政治唔提中央就唔真實，最後用隱晦啲嘅方法，我哋冇一個好具體嘅人物走出嚟，透過一啲事或者一啲人，譬如電話啦，嚟表達中央一直有牽涉喺入面。
F：李心潔第一次拍劇有乜要求？
B：想拍第一個女特首， KK第一個諗就係李心潔，我潑冷水話，李心潔點會肯拍呢？公司又冇牌，但心入面都覺得佢係最適合人選，好難得佢身為明星仍然有好 pure嘅氣質，呢個角色係有中上學歷，要係明星又要 humble係好吊詭；另外佢雖然細細粒，但唔係柔弱囉！佢經理人真係好好，冇嫌棄我哋係電視劇，冇嫌棄前景問題，亦冇擔心影響內地市場，只係重視個劇本，我哋將劇本畀晒佢睇，好快就應承拍喇。
K：其實冇次選，冇 plan B，老闆只有兩個要求，第一係要喺預算內完成，第二係李心潔願意做，否則就唔拍。
F：王宗堯（張癸龍）同李心潔（葉晴）有冇感情線？點解陳逸寧要咁激？
K：會穿橋喎！當冇啦，好似柴九同四奶奶，冇談情說愛，但兩人隱隱就有一種感情，呢種叫做革命式感情，兩個人過完一關又一關，默默幫佢完成選舉。以前拍劇係點呢？一定要發生啲事，你壞燈膽我幫你換、中間要有第三者出現，但現實生活唔係咁。
至於床戲係希望呈現真實世界，以前要以最安全最乾淨嘅嘢畀大家，但我覺得現實生活係冇漂白喎；性呢樣嘢唔係刻意標榜，而係張癸龍呢個人物係放蕩嘅人，唔同女人上床咁點表達呢？陳逸寧佢話着住衫都可以 make love喎，我問佢你會唔會着住衫 make love吖？咁佢就 ok，唔使清場添。
|
鍾意就快D Share啦！
|
|
|