馮仁昭四圍超：腫脹樂基兒硬撼膠面子珊 - 馮仁昭
樂基兒（Gaile）同黎明雖然離咗婚兩年，但每次出席活動依然經常俾人問及前夫問題，噚日佢同黎明婚前緋聞女友徐子珊一齊到鑽石山出席商場聖誕燈飾亮燈儀式，話題當然離唔開黎明
Gaile同子珊噚日都着咗露腰裙出席活動，呢排明顯增咗磅嘅Gaile雖然已經着晒黑色，條短裙腰位有喱士，但依然個小肚腩無所遁形，雖然着粉紅露腰長裙迎戰嘅子珊喺呢個回合先勝，可惜佢早前出現嘅膠臉仍然很膠，而且雙眼好腫，望落去有啲怪，佢就解釋話前晚先喺馬來西亞返港，所以唔夠瞓。
■浮腫嘅樂基兒（右）噚日同仍然膠面嘅徐子珊齊齊出席聖誕活動。
■子珊同黎明（右圖）傳過緋聞，更傳黎天王送車畀佢。資料圖片
新年後先減肥
曾經同黎明傳緋聞，問子珊同Gaile同場有咩感覺，就話：「緋聞都好耐唔係第一次同Gaile同場，喺後台有傾偈，覺得佢好sweet！」Gaile接受訪問時就好醒目咁話：「冇咩特別，知道你哋想問咩！我哋（同子珊）之前做嘢都見過，頭先喺後台都有傾偈。」有人問肥咗嘅Gaile係咪減肥中？Gaile就笑住話：「𠵱家係holiday season，新年後會開始減。」Gaile啱啱宣佈甩拖，但佢話聖誕唔寂寞，因為美國好多朋友。
撰文：馮仁昭
|
鍾意就快D Share啦！
|
|
|
