[FACE - 392] 靠 Chilam狂接聖誕騷 張振朗：扮多半年啦！ Chilam,張智霖,MF,

王祖藍唔只教張振朗扮 Chilam，仲拉埋佢去拍賀歲片，認真唔話得。

真面目

靠 Chilam狂接聖誕騷　張振朗：扮多半年

王祖藍靠扮嘢做到男一，仲可以娶埋高過自己成呎嘅李亞男，扮嘢真係有市場。好似最近張振朗扮 Chilam上位，除咗成為祖藍新寵，搵佢一齊拍賀歲片，仲成為接騷王，年尾先後接咗唔少 Annual dinner；嚟緊聖誕、農曆新年仲有排旺，登台扮 Chilam賺超過 10萬，不過佢都識見好就收，他說︰「扮得太耐觀眾未必鍾意，我諗扮多半年」

27歲張振朗 12年經訓練班入行，知專讀設計出身，上年中《星夢傳奇》出 2集即 foul，當時被稱為小 Bosco，雖然被簽做親生仔，但都諗住喺 TVB有排捱，點知喺節目扮 Chilam扮上位，成為接騷王。他說︰「我自己報名架，當日喺走廊見到《 Sunday扮嘢王》 poster，我咪去囉，扮咗幾個人，佢哋話最似係 Chilam。」

翻版

張振朗喺《 Sunday扮嘢王》上位，着住套飛機師衫，戴埋副 Ray-Ban又真係好似 Cool魔嘅。

正版

祖藍帶挈拍賀歲片

張振朗扮 Chilam神似，原來王祖藍都有幫手，他說︰「原先我會唱唱下除黑超，但祖藍睇我綵排後，叫我唔好除，一直戴住。後尾我先知效果好好多。」難得唱腔似 Chilam（樣其實似黃宗澤），令張振朗接咗唔少 Annual dinner同商場騷，商演仲排到出年農曆新年。他說︰「好多謝祖藍，佢仲安排喺佢套賀歲片演出，呢輪係多咗少少騷啦。聖誕、除夕、新年都有，我諗會 keep住扮半年啦，之後我都想轉，因為係時候喇，都想做返自己，扮得太耐觀眾未必鍾意。」識見好就收叻仔囉。

張振朗食住「 Cool魔」條水，接唔少 Annual dinner，每個騷穩袋$15,000。網上圖片

除咗 Annual dinner，張振朗都密食唔少商場騷，「身型自己偏瘦，唔難 keep，反而髮型一長咗就要剪。」網上圖片

祖藍唔只教張振朗扮 Chilam，就算宣傳《 Sunday扮嘢王》時都刻意介紹張振朗出場，仲叫佢清唱〈歲月如歌〉。網上圖片

今年張振朗搵多咗，拍劇戲分亦多咗，最近仲入埋《愛．回家》同高 Ling有唔少對手戲。電視圖片

狂接騷

網上圖片

雖然只係「翻版 Chilam」，不過台下觀眾依然睇得 high，「〈歲月如歌〉係必唱嘅，但最緊要係開始有人認識。」

收埋索女友

張振朗唔似「 Cool魔」咁花弗，原來私下感情好專一，現時同《 Sunday扮嘢王》扮王妃的陳芷尤拍拖，二人感情穩定，不過張振朗例牌唔認，「邊有呀？大家係同訓練班啫，好朋友咋。」靚仔扮單身，大家明㗎啦。

陳芷尤《五覺大戰》神獸天使出身，又有 C cup身材。最近同男友張振朗一齊喺《愛．回家》有連戲角色。《蘋果日報》圖片

張振朗事業開始起飛，同女友陳芷尤感情亦穩定，不過佢就話大家係朋友啫，唔係拍拖喎。網上圖片

鍾意就快D Share啦！

下一篇 》