阮兆祥撐港視 被TVB飛出東華
大台小器，眾所周知。繼早前無綫（TVB）打壓禁廖偉雄開騷扮乜太後，原來一向效忠無綫的阮兆祥，亦因為日前在棟篤笑上力撐王維基的香港電視網絡（HKTV）而辣㷫無綫，慘被秋後算賬。原本祥仔有份為下月《歡樂滿東華》演出，但據可靠消息指出，祥仔前日已被無綫踢出局，取消他演出，看來明年約滿無綫的祥仔，續約一事隨時凍過水！
近年扮嘢扮出位的阮兆祥，上周四在灣仔伊館舉行一連四場首個《阮兆祥2014硬食博覽棟篤笑》，繼之前扮許Sir和齊陰的母親宣傳棟篤笑後，祥仔今次開騷更「肥子華」、Wyman、「下陷BB」和金正恩上身，以搞笑形式論盡娛樂圈熱門話題。不過，今次祥仔最受注目的並非扮嘢功夫，反而是他身為無綫人卻公然力撐港視的言論。
■阮兆祥扮Wyman讚王維基的港視節目有質素。
資料圖片
網民大讚真漢子
在第二場棟篤笑上，祥仔力撐港視說：「有位朋友睇住佢硬食無數次，但係佢依然用香港人打不死嘅精神，等咗59個月，終於得到個牌，嗰個就係王維基！」接着又唱改編歌大讚港視：「無牌，全靠基基手快，電話想踩界，問問是不是人狼大晒，好事即刻破壞，港視高質素不發牌，最好兩台玩晒！」就連當晚擔任嘉賓、盛傳跟無綫高層余詠珊不和的曾志偉，亦在台上踩多腳，指無綫是「天下間最衰嘅電視台。」
當晚祥仔敢言獲網民大讚是真的漢子，雖然事後被問到會否擔心力撐港視而得罪無綫時，祥仔強調歌詞內容客觀，只是唱出大家心態，絕非偏頗任何一方，但據可靠消息指出，祥仔當晚言論引起無綫極度不滿，原本下月6日舉行的《歡樂滿東華》，祥仔獲安排跟關菊英演出歌唱項目，前日祥仔突然被無綫通知取消《東華》演出，卻未有解釋原因，明顯因為祥仔力撐港視而遭秋後算賬。
■原本下月《東華》中，祥仔獲安排跟好友關菊英一起歌唱表演。
資料圖片
原計劃扮余詠珊
據了解，祥仔本計劃在棟篤笑中扮埋余詠珊，以早前余詠珊接受雜誌專訪內容大玩特玩，惟最後祥仔考慮出街後會令對方尷尬，最後打消念頭，改扮黃夏蕙的「下陷BB」，不過最終亦難逃被秋後算賬厄運。明年2月祥仔將約滿無綫，日前他表示會優先考慮續約無綫，但如今看來續約一事分分鐘凍過水。
記者昨日致電祥仔，求證他被《東華》飛出局一事，祥仔未肯回應，只說：「唔好意思，suppose我哋唔應該接受你哋傳媒訪問，同埋我𠵱家做緊嘢，答唔到你，多謝你哋關注，thank you。」今次祥仔棟篤笑是由商台主辦，記者昨致電商台首席智囊陳志雲，對於祥仔因為力撐港視而遭無綫踢出《東華》，陳志雲揚言未有聽聞，並謂：「不過相信唔會嘅，有時啲節目尤其是綜藝節目裏面啲項目，有時都會有最後一分鐘調動，可能係其他原因㗎啫，我唔相信TVB因為佢棟篤笑演出提及過HKTV香港電視，就會唔高興，我諗TVB都會明白，佢做一個棟篤笑都係城中話題，蜻蜓點水式咁提吓，都係好意料中事嚟嘅。」
採訪：魯吉
■扮嘢王阮兆祥上周開棟篤笑扮黃子華講政治，又公然力撐港視，結果辣㷫無綫，被飛出《東華》演出。
資料圖片
■當晚有現身撐場的陳志雲（右）指未有聽聞祥仔被飛出《東華》一事。
資料圖片
■原本祥仔計劃在棟篤笑中扮余詠珊，但最後為免對方尷尬而打消念頭。
資料圖片
|
鍾意就快D Share啦！
|
|
|