[忽然1周 - 1010] 咦？周汶錡凸肚喪揀平底鞋？ 周汶錡,MW,

全部平底鞋擺喺度慢慢試，斗零踭 bye bye。

媽咪姐

咦？周汶錡凸肚喪揀平底鞋？

上個禮拜媽咪姐執衣櫃，順便襯衫，點知襯嚟襯去都係爭啲嘢。係啦，咪就係爭咁幾對鞋囉，於是乎即刻衝咗落銅鑼灣百德新街𥄫𥄫。

落到鞋舖，就撞到周汶錡（ Kathy）同個男仔 friend行街。嗰日佢好輕便，鬆身裙、鬆身衫再加個手袋仔。雖然媽咪姐見慣明星阿太，但 Kathy話晒係名模，又啱啱攞咗個「十大傑出衣着大獎」，梗係乘機𥄫吓佢揀乜嘢鞋款學吓嘢啦。不過見佢揀親嘅都係平底鞋，以一個女性角度分析，有乜理由唔揀高踭鞋先？呢個人相當有可疑，死跟。

睇完鞋，佢就孖住男友人過咗隔籬幾間舖睇衫，離奇嘅事情又發生啦。 Kathy睇親都係鬆身衫，仲隱約見到佢個肚有少少隆起喎。嗯……究竟係媽咪姐諗多咗，定係就嚟有好消息公布先？

咦！點解個肚仔凸咗出嚟嘅？

行過隔籬舖時，不自覺掃吓條腰骨喎。

前年， 38歲嘅周汶錡豪嫁拍拖 6年法國俊男 Julien Lepeu，老爺仲係名牌代理 Richemont嘅財務董事，身家億億聲，確係要生多幾個繼承家業嘞！

潮媽之選

Kurt Geiger係英倫鞋履品牌，潮媽陳慧琳都熱捧呢個牌子，不過生完嘅佢着斗零踭，而 Kathy揀平底。唔通 Kathy就嚟加入潮媽行列？

混血新世代

近年娛樂圈掀起生 B潮，個個趕喺 40歲前生仔，而模界就係混血 B嘅天下。嘩！唔好怪媽咪姐偏心，啲混血 B真係特別 cute，好想咬佢哋一啖呀！

男神女吳斐然

吳彥祖同中、法、猶太混血名模 Lisa S.嘅乖女吳斐然，絕對係混血靚 B嘅最佳人辦。眼大大，可愛到暈！難怪 40歲吳彥祖好想同 39歲嘅 Lisa S.，再努力追多個

大命 B India

有「翻版鍾楚紅」之稱嘅泰國、瑞士、愛爾蘭混血女模 Cara G.，今年 3月同鬼模老公 Jesper生咗囡囡 India。不過 B女一出世，就要入 ICU留醫，好彩最後無事，依家仲好精靈㖭！

最期待的混血 B！

大家依家最想知嘅，梗係 GiGi同佢個西班牙老公 Sergio生嘅 B女會有幾可愛大約出年 3月就見到嘞，不過 GiGi話照超聲波，已經見到囡囡手長腳長呢。

鍾意就快D Share啦！

下一篇 》