小三攝入屋
據街坊表示，早於一個月前爆出家暴事件後，小三 Ruby便趁阿 Yu搬回娘家住時，正式入住周永恒這間「人渣屋」，實行鵲巢鳩佔。
娛樂喧
鄰居爆料 周永恒拆蟹嘈天光 小三 Ruby霸大婆 Yu屋
自稱「人渣」的周永恒，自拋妻棄兩女後一直量地冇工開。至於小三 Ruby也相繼潛水，曾聲稱會與人渣恒斬纜的她，原來已悄悄進駐男方位於天水圍的寓所同居，實行鵲巢鳩佔瞓阿 Yu（趙頌茹）舊牀。
記者連日守候，發現周永恒淪為阿四，每日瞓到日上三竿便落街買二人分量飯盒回家餵新歡，日前他更在超市掃了八隻大閘蟹返歸和小三慢慢拆。不過有街坊投訴二人經常在深夜不斷發出聲響，垃圾又扔到一地都係，更旁若無人在屋苑走廊親熱，傷風敗德。
對於小三瞓自己舊牀，日前阿 Yu出席活動時說：「好肉酸！祝福佢哋囉！」
周永恒先後涉嫌向老婆動粗及向外母吐口水被告上法庭，但最終獲法官放生。贏咗場交輸咗個家，自認人渣的他近日一直匿埋避世唔見人。
坐食山崩等餵飯
本性難移，周永恒絕無靜思己過，反而在家玩禁室培慾。據知他與介入自己婚姻的小三 Ruby一直未斬纜，上個月女方更大膽進駐人渣恒的天水圍翠湖居寓所，實行瞓阿 Yu舊牀。早前小三 Ruby曾化名在網上留言和上載照片，指男友沉淪性癖，又表示有人提議她玩 3P，作風大膽。
記者連日守候發現，周永恒與 Ruby之前一齊搞的模特兒公司，如今停止運作。而一直匿在人渣屋的 Ruby，同樣量地冇工開，連日來她都飯來張口，每日等周永恒落街買飯盒。周永恒有日到寓所樓下的超級市場，花$200買了八隻大閘蟹回家與 Ruby慢慢拆。據知有街坊向管理處投訴，當晚二人在深夜時分，多次發出碰撞聲，加上估計在酒精影響下，二人嘈到拆天，擾人清夢。
鄰居投訴深夜擾民
一名受影響的鄰居向本刊稱：「當晚半夜 12點聽到個男嘅大嗌，咆哮嗰種嗌，跟住又同個女仔發出撞門聲。你唔使做啫，我哋個個第二朝仲要返工返學㗎！其實佢哋平時扔垃圾已經好離譜，明明行多兩步就係垃圾桶，但佢哋就鍾意放啲垃圾喺垃圾桶側邊，又唔綁實個袋，啲餸頭餸尾搞到又腥又臭，未見過啲人咁乞人憎。」
記者之後又嘗試訪問與周永恒同座的住客，大家聽到當事人個名都避之則吉。其中一名街坊更對記者說：「我同佢唔同層，所以聽唔到，但管理處保安話佢哋好嘈，三日唔埋兩日就俾隔籬左右投訴，搞到差啲要報警。」記者日前曾訪問該棟大廈保安，但他以住客私隱為由，拒絕回應。
「人渣」情侶神憎鬼厭
自從 Ruby和周永恒雙宿雙棲後，天水圍街坊即時怨聲載道。事關二人不單公然在走廊攬啜抱，深宵更經常嘈到拆天，難怪街坊要向大廈管理處投訴。
阿 Yu表現冷淡
對於前夫的惡行，阿 Yu表現心淡。日前她出席活動時，直斥人渣恒「唔成熟」。
記：你知唔知 Ruby搬咗去天水圍同阿 Roy同居?
Yu（淡然說）：哦！係咩?
記：佢哋仲成日嘈到拆天俾鄰居投訴!
Yu：佢咁大個人應該知自己點做，唔好再咁唔成熟。
記： Ruby瞓你舊牀喎，你嬲唔嬲佢?
Yu：吓！好肉酸。我睇清楚囉！睇清楚呢個人！其實唔想再回應關於佢哋嘅私人事。祝福佢哋囉!
記：同阿 Roy再見不是朋友?
Yu：我係一個成熟嘅人，有關於兩個女嘅事如果佢需要知，都會俾佢知。我哋依家分居狀態，總之我同佢之間只得兩個女。
逃避贍養費
而之前一直表明「唔會離婚」的周永恒，據知其實有心逃避支付贍養費。一知情人透露：「阿 Roy（周永恒）話死都唔會離婚。我哋以為佢睇住啲女份上會改過，佢就話冇錢俾贍養費，話自己冇嘢撈，最好阿 Yu掉轉頭俾番佢。」目前阿 Yu自力更生，與兩女租住屯門一間四百呎的舊樓過新生活，亦簽了前英皇高層做其經理人，努力接 job出活動賺學費。對於前夫拒絕俾贍養費，阿 Yu苦笑說：「我係一個願意靠自己嘅人。」
記者日前亦嘗試採訪周永恒，最初他沒有回應，一支箭衝入大廈，但突然掉頭走向記者身旁。當聽到 Ruby的名字後，周即表現忟憎地說：「你哋唔好搞我！」匆匆跑回家中。
密密接 job
爆出家暴事件後，帶着兩個女兒重新生活的阿 Yu，反而得到廣告商青睞，近日密密接 job，事業露曙光。
活得比你好
邊個話結婚一定要靠老公？邊個話離婚唔可以靠自己？市面上好多失婚婦人頓變女強人，單是圈中已有不少好例子。
|
鍾意就快D Share啦！
|
|
|