造型曝光
吳君如在《 12金鴨》的造型，除了將頭髮剷青和將膚色化黑外，更利用化妝技術弄了假腮骨及假喉核，使她看上去有男人的輪廓，有點貌似陳年密友俞琤（圓圖）㖭！
娛樂喧
假喉核裝陽具扮鴨 吳君如新片造型複製俞琤
吳君如年初親自監製電影《金雞 sss》，戲中君如狂碌人情卡請來多位巨星助陣，結果票房破 4,000萬，成華語片賣座冠軍。君如食髓知味，最近再度添食，開拍《 12金鴨》，連鴨都玩埋。
為製造神秘感，君如今次刻意隱藏戲中飾演「鴨王」的演員，但據知原來戲中「男主角」正正就是君如本人。為了營造逼真效果，她會為角色安上假腮骨、假喉核，甚至裝埋假陽具！本刊日前獨家拍到君如戲中造型，頭髮剷青的她，似足陳年密友俞琤。
年初的《金雞 sss》找來影帝張家輝及梁家輝等幫手，最新的《 12金鴨》亦不例外，君如繼續碌人情卡，找到一大班圈中好友幫忙，更找來古天樂出錢投資兼擔任鴨仔。
上月 26日，《 12金鴨》正式開拍，但君如卻罕有不提演員，外界一直猜測戲中鴨王是由古天樂飾演。但本刊收到消息，上次裝假狗扮大胸媽媽生的吳君如，新戲會再下一城，反串扮男人做鴨。由她率領其餘 11隻鴨仔包括古天樂、周柏豪、任達華、劉浩龍及黃偉文等被一眾女角去嫖。
君如為求造型逼真，更會為自己弄上假腮骨、假喉核甚至假陽具，逼真程度絕不比上次《金雞 sss》 38G巨胸遜色！知情者透露：「上次做假胸，連血管毛孔都做得好仔細，所以君如今次想做埋喉核同陽具。不過君如就話做假陽具嗰陣有啲尷尬，因為要長時間腿張開，俾個化妝師對住佢下面好耐！」
麻甩印印腳
日前（ 5日），本刊獨家直擊《 12金鴨》開工，君如戲中造型首度曝光。身穿皮褸、黑褲、短 boot兼剷青的她，驟眼望過去，竟然有八成似與君如傳過緋聞的商台副主席俞琤。現場所見，君如唔單止造型似男人，連行為舉止都似層層，邊行邊插褲袋𢱑幾𢱑加腳印印，勁麻甩。
Joey為師兄𢱑撈
至於飾演嫖客的一眾女星名單則有女神陳妍希、天后容祖兒，還有上次《金雞 sss》爆出的王菀之等。知情人續說：「 Joey（容祖兒）私底下打俾君如，叫君如考慮吓俾個角色劉浩龍，最好就做嗰 11隻鴨仔嘅其中一隻。仲話如果可以預埋劉浩龍，自己做嫖客都冇問題。咁君如覺得其實擺一 pair情侶落去都幾得意。佢仲度埋劇情，要 Joey叫番劉浩龍呢隻鴨，幾有睇頭，所以劉浩龍先做到依家呢一角！」
|
鍾意就快D Share啦！
|
|
|