掃呢頁CODE去手機

2014年12月24日 星期三

[FACE - 396] 港視《來生》寸得應 編審鮑偉聰:冇可能過到大台關 港視,鮑偉聰,MF,




編審:鮑偉聰(圖左)

代表作:《珠光寶氣》

總導演:陸天華(圖右)

代表作:《天與地》編導

爆 Like王

港視《來生》寸得應 編審鮑偉聰:冇可能過到大台關

講中港矛盾問題嘅劇集先有《老表,你好嘢》,不過搞笑劇情,始終到喉唔到肺。

講有共鳴,點都唔及最近港視套《來生不做香港人》咁中 point。

劇中劉美君,張可頤原來真有其人。

編審鮑偉聰同總導演陸天華(兩人都由大台過檔)仲話,呢套劇冇可能喺大台出現,甚至連一場戲都冇可能過到大台班高層嗰關!

F:《 FACE》 鮑:鮑偉聰 陸:陸天華

F:為何會創作《來生不做香港人》?

《來生》係張可頤重出江湖之作,網友話佢寶刀未老。

鮑:創作總監蔡淑賢話有個真人真事故仔,佢聽完朋友講之後喊。我話搞得你喊,呢個故仔應該都唔錯,於是我再同總導演研究可唔可行。

而呢個劇想表達啲人成日話香港唔掂,有仔女都送去外國讀書;但又有好多大陸人嚟生仔,或者嚟讀書或工作之後留低。咁究竟香港人係值錢定唔值錢呢?呢套劇想引起嘅思考就係做香港人究竟好定唔好呢?將來仲想唔想做?

F:現實中真係有呢對姊妹?

劉美君一角真實叫洪亦文,鮑偉聰話真人好有霸氣,而劉美君亦同真人版有 8成似。

陸:係,𠵱家嗰對姊妹一個喺大陸、一個喺香港,大陸嗰個係東莞鳳崗鎮嘅其中一個人大代表。其實真實版同劇集掉轉,大陸那個是妹妹,香港嗰個係家姐。

香港嗰個賣健康食品,現實冇張可頤咁串,只係戲劇處理嚟嘅;但劉美君嘅角色就同原型差唔多,都係咁霸氣。

劉美君睇咗個劇本好鍾意,佢叫我哋帶佢上去認識呢個人,然做仲 friend咗,同佢一齊食飯、傾偈。學佢啲舉手投足、小動作,所以𠵱家出嚟嘅形象,同真實嗰個美田係一樣嘅。

F:劇中唔少戲喺大陸實景拍攝,拍攝上有冇障礙?

陸:套劇之前叫《客家女人》,其實係掩飾名嚟,因為要大陸取景,如果用《來生不做香港人》咁尖銳嘅劇名,就未必咁容易攞到批文。

拍之前都要同當地部長,幹部打交道,好多時都要同佢哋搓兩板,喺香港申請,你批核,我就拍,但喺大陸要坐低飲杯茶,傾下偈先。

中秋前幾星期,真實版嘅美田,佢就打電話畀我哋,點解你哋中秋節冇任何表示?你哋唔送禮㗎?你哋唔送禮第日上嚟拍好大件事㗎,於是臨急臨忙我就同其他同事,攞住一大抽月餅上大陸,逐個部門去送月餅,呢個就係國情唔同喇。

F:如果《來生不做香港人》要喺 TVB播,你估要作出咩修改?

鮑:係不可能發生嘅事,就等於清真寺內食豬肉,係佛寺內劏牛。你講緊不可能發生嘅事,首先題材上面,講中港問題,佢都會搞到《老表,你好嘢》咁樣,如果要好似《來》劇,咁深入咁尖銳去呈現,你個故事分場過唔到上面高層㗎。因為喺 TVB你嘅故事分場係要被高層審批,唔只一個高層,係好多嘅高層。第一集分場都過唔到,點會有《來》呢套劇出嚟。所以如果呢套劇去咗 TVB會將所有尖銳對白 cut晒囉!變成一套只講姊妹情、愛情嘅劇。

F:做香港人仲值錢?

鮑偉聰(右)除咗係港視編劇,仲同陶傑(左)一齊主持商台節目《光明頂》,以熟悉國內行情見稱。

鮑:以前香港人喺東南亞好值錢㗎,港男係一個標籤嚟,𠵱家香港呢個身份同以前 10幾年前比唔同咗。

陸:我好記得廿幾年前上大陸拍劇,嗰陣時做香港人好有優越感,香港人上到去,好多人有一種羡慕嘅目光望你。

𠵱家上大陸已經冇,人哋有一種:「唓!香港人好叻咩?」嘅感覺。我哋將來係咪繼續被邊緣化?係咪需要揾另一條路去確立番香港人優勢呢?



鍾意就快D Share啦!