掃呢頁CODE去手機

2015年1月9日 星期五

[忽然1周 - 1015] 66歲小鳳姐 應使則使生日會 小鳳姐,徐小鳳,MW,




66歲小鳳姐呢個生日 look,非常雍容華貴。 16年前已經着緊嘅毛領褸,換過啲鈕,又着得!配埋個烈焰紅唇,當年今日都咁喜氣洋洋!

媽咪姐

66歲小鳳姐 應使則使生日會

啱啱過咗嘅元旦係徐小鳳 66歲生日,小鳳姐就好似佢首飲歌一樣「熱烈地彈琴熱烈地唱」,約埋一班親友去咗萬麗海景酒店擺幾圍熱烈慶祝!咁小鳳姐坐擁億半身家,張單梗係自己搞掂啦,型呀!

嗰日小鳳姐個生日 look都唔簡單,淨係嗰個金光閃閃大頭箍已經震懾全場!同佢腳上嗰對 4吋高、鞋踭有 bling bling心心嘅高踭鞋,可謂互相輝映。不過,最令媽咪姐驚嘆嘅係,望望吓發現小鳳姐身上嗰件粉藍色毛毛領褸,查實佢喺 16年前已經着緊嘞, amazing!你點估到超級大明星小鳳姐可以咁鬼慳家,一件褸着十幾廿年先?過咗兩日,小鳳姐出席活動,亦繼續着番嗰對 bling bling心心鞋,拎番同一個手袋。

所以唔好話媽咪姐唔教精你哋班後生,大家真係要學吓小鳳姐!應慳得慳,應使得使。唔係邊得小鳳姐依家有成 16個物業揸手,日日都咁喜氣洋洋吖!

小鳳姐唱咗超過 40年,一賺到錢就買樓,少買衫,依家每個月單係收租都收成 40萬!

周二( 6日)小鳳姐又出動去理工嘅籌款晚會。佢仲話知道阿倫開騷:「校長喎!梗係要睇。(搵你做嘉賓?)我排緊隊!」唔覺意望吓對鞋同個袋(圓圖)。咦,又係佢哋喎!小鳳姐果然物盡其用。

睇騷再着

近年無乜嘢做嘅小鳳姐,得閒就去睇騷,上個月先同前主播葉雅媛(左)去睇 Sammi,仲巧遇紅姑。咦,件褸咁熟口面嘅。

元旦日下晝 1點幾,小鳳姐就坐七人車離開大埔道屋企。唔同一般明星坐後座匿埋,佢坐正副駕駛座。個頭仲……有啲亂。

酒店豪食

唔使驚!一落車,小鳳姐就戴番好個金光燦爛大頭箍,同成班親友喺萬麗海景嘅美景閣傾吓食吓,玩足兩粒幾鐘先走, happy!



鍾意就快D Share啦!