掃呢頁CODE去手機

2015年1月9日 星期五

[忽然1周 - 1015] 亞視男藝人大控訴 遭王征玩完拋棄 亞視,王征,MW,




滾熱辣

亞視男藝人大控訴 遭王征玩完拋棄

亞洲電視頻頻拖糧,十二月份的人工依然出糧無期。至於投資者王征就一直「潛水」,不過他在微博就依然發放風花雪月的生活照,懶理亞視員工死活。

亞視混亂,原來都不及王征私生活混亂。《亞洲星光大道》出身嘅梁景煌( Tommy)對本刊爆料,踢爆王征性癖之餘,更自爆因為貪圖一紙藝員合約,和他發展關係。兩人在 2013年農曆正月初五,首次在王征的深圳寓所玉帛相見,王征試過對他上下其手, Tommy更說:「佢揸我下體。」兩人親密關係維持半年, Tommy被玩厭拋棄。

控訴陸續有來,除了 Tommy外,另一星光幫參賽者李明憲,亦因為不甘被王征「摸身摸勢」劈炮唔撈。將公司當後宮,員工當妃嬪,王征縱然完成他口中的「歷史任務」,卻成為亞視的污點!

自 2009年入主亞視後,王征便將其「紅色」(即內地)的管理手法帶入亞視。近半年亞視發生多次拖糧事件,王征身為亞視主要投資者,實在難辭其咎。

更甚的,是王征利用老闆身份,向男藝員「埋手」,成為他的密友。 2011年亞洲星光大道出身的梁景煌( Tommy),參選後一心想成為全職亞視藝人,後來被王征睇中, Tommy即一登龍門,由二打六變成亞視「新寵」。可惜他自嘲是王征玩具,最終付出卻收不到回報,不但只得到一份每月底薪僅 6千的合約,更被拖 9個月糧,奀過做洗碗。

王征索肉照撩上門

雖然對梁景煌玩完即棄,不過近日王征忽然又在微信要求對方上佢深圳屋企,更向梁景煌索取私照。本刊曾核對與梁景煌對話的微信戶口,確認屬王征本人。

新年陪老細

梁景煌表示,在 2013年年初五,王征叫他去位於深圳萬科天琴灣的家飯局。到了晚上,其他人借故散去。梁景煌指王征對他上下其手,兩人更一齊瞓,王征摸他的下體。

愛黐嫩男

據悉王征愛黐後生仔玩,當中包括「星光幫」的彭遠揚(左一)和楊正軍(左三),以及「亞洲先生」徐丁(左二)。

徐丁得寵

王征新年去了北京,徐丁(右)亦陪伴在側。能夠成日在王征身邊出現,徐丁明顯是近期最得寵的一個。

深圳寓所陪瞓

Tommy憶述與王征初見面時,不禁皺着眉:「 2013年年初五,徐丁( 2011年亞洲先生)打俾我,話嚟緊有個 show,去王征喺深圳萬科天琴灣嘅屋企。當日王征同齊真晨( 2012年亞姐亞軍)、徐丁等八、九個藝人一齊喺間屋飲飲食食。大家跳吓舞、唱吓歌,娛樂吓王征,成班人好似佢嘅玩具。食食吓飯,王征用國語同我講:『你跳舞好棒,出來跳一首吧』。咁我就出去跳。最好笑係,呢啲嘢又唔會播出街,竟然可以計番 show錢。因為藝員科講過,葉家寶嘅助手都講過,如果要去陪老細,可以同藝員科講番,會計番一個或者半個 show錢俾我哋。」

跳舞都係小事,好戲在後頭。 Tommy嘆口氣:「食完飯,佢哋(指同場藝人)撇低我走咗,得番我同老闆(指王征)。王征要求我喺佢屋企過夜,我冇車,嗰度又遠,我走得去邊?我唔知佢真醉定假醉,總之卿卿我我一輪,佢就同我接吻,諗番都好核突。(王征對你做過乜?)有錫過囉,跟住喺張牀度瞓囉,佢好似千手觀音咁摸我。我都有摸番佢,佢繼續用手摸我,又揸我下體,仲用手按我個頭去佢嘅下面……。不過呢樣我真係唔得。」

「老闆娘」落難

梁景煌曾在亞視被稱為「老闆娘」,對現時為生計要在茶餐廳做清潔,他亦十分慨嘆,但表示為了母親過得更好,他絕不介意。

2013年尾,梁景煌參選「 Mr. Gay」並獲得亞軍,卻因而成為亞視雪藏他的藉口。

現年 24歲的梁景煌曾在演藝學院讀芭蕾舞,試過代表香港往澳洲比賽,後在海洋公園擔任表演員。 2011年他參加《亞洲星光大道 4跳舞吧!》,因而以 part time形式加入亞視。

上海見家長

微博控訴

早前梁景煌在 fb發炮,指自己不是王征的玩具,他更稱呼王征為「以前嘅契爺」。

而一心搏成名的 Tommy,為了可以簽長約,最終與王征發展關係。之後王征更帶 Tommy去上海與父親見面,升格為「密友」。 Tommy說:「我去咗佢父親屋企,王征叫我稱呼佢父親做『爺爺』。」

衰過避孕套

雖然 Tommy表示陪王征的次數「十隻手指數得出」,但他獲寵幸已成為公司公開的秘密, Tommy亦如願以償簽了長約。「我陪完王征去上海後,上埋洗腦課程, 2013年年中就有份月薪六千蚊嘅長約俾我,仲有得做兒童節目主持。以前我出席乜嘢節目都要自備衣服。關係曝光後,服裝間有好多衫俾我揀,服裝間阿姐仲叫我做『老闆娘』。」

但 Tommy的「升呢」待遇,只維持了兩個月左右,同年十月他參加 Mr.Gay比賽後,公司便雪藏他。他憤憤不平說:「合約冇講明唔可以參加比賽,但我參賽之後,亞視就停我工作。我上微信搵王征,發現佢連我個名都 delete埋!簽約後,亞視只係出過三個月糧俾我,到依家仲欠我九個月人工。」

做了主持兩個月便雪藏, Tommy有寃無路訴,更自嘲被人用完即棄。「我覺得自己仲衰過避孕套!同王征一齊我好似後宮妃嬪,但就算打我入冷宮,都要有啲好嘅理由吖。」

「班長」都中招

星光幫的「班長」李明憲對本刊表示,有一晚接到藝員科電話,要半夜陪王征唱 K,他說當晚被王征摸身摸勢。

據李明憲說,王征摸他時譚杏藍(圓圖)亦在場。不過為免得罪人,她就賴自己早走:「我有去,不過早走。(知唔知李明憲俾王征摸?)有聽過係有人對佢毛手毛腳,我覺得男人老狗飲咗酒,搭吓膊頭一定有嘅。(知唔知王征同黃文韜 kiss?)事後係有人講過。」

王征曾與李明憲一同出席亞視活動,據知王征十分「欣賞」充滿男子氣概的李明憲。

李明憲表示,當晚目擊亞洲先生出身的黃文韜(左圖)與王征在 K場嘴對嘴。

葉家寶周三( 7日)受訪時表示,唔清楚王征同梁景煌的關係。

李明憲:佢都有摸我

王征經常晒生活照,圖左為王征父親。 Tommy表示曾見王父,反映他當時得寵地位。

除了 Tommy被「用完即棄」,其實還有其他男藝人中招。人稱「班長」的李明憲, 09年參加首屆《亞洲星光大道》入行。在 2011年離開亞視的他,也坦承曾俾王征毛手毛腳。

李明憲說:「有次出席完首映,返到屋企收到藝員科電話,叫我去蘭桂坊陪王征。我同譚杏藍、羅迪龍一齊到,亞洲先生黃文韜之後自己到。坐低冇幾耐,王征開始摸我膊頭、心口同腰部,對我摸身摸勢,之後我借啲意行開避佢。

「當我回頭望,就見到王征同黃文韜嘴對嘴 kiss,咁我之後梗係識趣走人啦。其實我都聽過陪老闆可以計番一個 show錢,王征要藝人陪佢至俾嘢你做,我覺得好恐怖囉,所以一年死約之後我就冇續約。」

就 Tommy的控訴,本刊向亞視執行董事葉家寶詢問。葉家寶表示:「同事出席公司安排嘅活動,就算喺內地,都會計番騷錢。(梁景煌出席王征飯局,係私人活動喎!)呢件事一年前有多,我唔清楚。」

至於梁景煌指,葉家寶助手曾承諾陪王征可以計騷錢,葉家寶指自己冇助手,只有一名秘書,又指其秘書不插手藝員事務。但據知梁景煌所指的「助手」,其實是葉家寶就任亞視高級副總裁時候的秘書,身兼助手工作。而本刊在截稿前仍未能聯絡王征。

雖說事件已經一年有多,不過本刊向葉家寶提及有否欠梁景煌薪金時,他亦只是表示唔清楚。似乎亞視對數目,真係唔太分明,難怪搞到如斯田地!

陪客有前科

除了亞洲先生及星光幫要陪老闆,近年更多次傳出亞姐要北上做陪客。

顏子菲被迫應召

08年亞姐亞軍顏子菲,近日大爆在亞視六年期間,多次被公司以 casting為名,要她出席陪客飯局。被問及席間見到甚麼?她說:「總之係啲令人毛管戙嘅事。」

仁美脫離亞視

2013年,有傳當時王征看準「仁美清叙」會員的人脈,要求將「仁美」商業化,更有傳有人要仁美會員北上陪政要。故黎燕珊與亞視「分手」時,以她為首的「仁美」即脫離亞視。

劉錫賢:同王征唔熟

作為亞視舊人的劉錫賢,平日都相當敢言,但一聽到王征搵男藝人陪,就決定封口:「有啲咁嘅事?同王征唔熟,佢冇叫我去佢啲 party。(知唔知徐丁成日陪王征、梁景煌又被叫做『老闆娘』?)吓!咁就不願置評嘞。」

徐丁:有車人去王征屋企

至於被指是搞手的徐丁,被問到前年年初五有冇上過王征屋企時,就前言不對後語:「唔知……可能有幫佢招呼客人。有時王生會叫我車啲客去佢屋企食飯。(你叫梁景煌去?)冇叫佢,點會係我通知。(現場有藝人?)係,但我唔知道佢哋一齊食飯!」吓!你有份招呼客人,但唔知藝人去嚟做乜?

盛品儒:有啲飯局計騷錢

身為王征表弟嘅盛品儒,事發時是亞視高層。問到王征有冇叫藝人陪佢?盛品儒就冇否認。「過去我哋成日出差,有時會搵亞洲先生同亞洲小姐出席客戶嘅飯局。至於你話王生私人叫,我就唔清楚。(藝人出席飯局有冇計番 show錢?)某一啲會有,但唔係所有活動。(就算唔係出街嘅節目,都計 show錢?)有一啲係有嘅。」

亞視混帳

自稱「良心電視台」的亞洲電視,自去年六月不斷發生拖糧,之後又有藝人約滿未傾約、藝人遭雪藏等事,新聞日日新鮮。

叫員工扮開廠

據悉王征不時招呼自己的客人到亞視,試過為突顯亞視盛世,叫員工「扮開廠」,又要他們做布景板陪影合照。

約滿唔傾續約

有台柱之稱的朱慧珊及劉錫賢,兩人在去年八月尾均約滿亞視,但直至九月份兩人才與亞視達成續約協議。近年有分量的藝人,如陳啟泰都紛紛離巢,令亞視藝人買少見少。

藝員遭秋後算帳

有「亞視嘟姐」之稱的筱靖,九月拖糧事件發生後,出席活動時指自己月薪只有七千及「出糧是天經地義」後,便遭亞視雪藏。筱靖近日向亞視提出解約,已獲亞視口頭答允。



鍾意就快D Share啦!