掃呢頁CODE去手機

2015年1月8日 星期四

[壹週刊 - 1296] 與第四任有米老婆離婚  63歲夏韶聲:我冇分佢家產! 夏韶聲,M1,




與越南華僑富家女 Tina離婚,問夏韶聲有冇為九年情挽留,佢話:「冇用㗎,今日話唔炸你呢樣,跟住咪又擲個炸彈炸第二樣,女人係咁!」

(《忽然 1周》圖片)

探熱針

與第四任有米老婆離婚  63歲夏韶聲:我冇分佢家產!

有「樂壇搖滾教父」之稱的夏韶聲,○五年以五十三歲半百之齡,再加三次離婚紀錄,仍娶得當時只有三十八歲、越南華僑前首富女兒 Tina做第四任老婆。

標富貴尾會的夏韶聲,口口聲聲指 Tina是他最後一個女人。上週,他承認第四段婚姻又玩完, 63歲冇女一身輕:「為自由斗零都唔要,離婚我冇分佢家產。」四合四離,昔日屢敗屢戰,今日夏韶聲又再誓神劈願:「唔會再結第五次。」

好得三個月

近年回流香港的夏韶聲,平日湊孫為樂,下月會推出第五張發燒碟《諳》。事業再發力,但昔日同有米老婆 Tina糖黐豆的他,上週六(一月三日)接受訪問時,身邊只有孫仔。提到婚姻狀況,他坦白承認去年已搞好離婚手續,同有米 Tina各走各路。

「我啱啱離咗婚,上年七月搞好晒手續。其實呢八年兩公婆都出問題,我工作同家人都喺香港,佢喺美國要做生意,我要返嚟佢唔肯,又二十四小時全天候轟炸,半夜三更要聽我把聲先肯瞓,聽落好甜蜜,起初拍拖梗係冇問題,但耐咗就發覺唔可以咁相處。」

歸根結底,年齡相距十五載,加上拍拖四日便閃電定終身,日子久了,問題才浮面。

「拍拖初頭幾個月好似烏蠅黐蜜糖咁,但三個月之後就成日有拗撬,我唔怪佢,佢溫室長大,睇嘢好狹窄。學死鬼阿媽話齋,結婚都係要竹門對竹門,木門對木門。」

夏韶聲出身草根,當日遇上含住銀鎖匙出世的 Tina,近乎要風得風。對方為他一擲二百萬美元(約港幣一千六百萬),買入四萬呎連花園的獨立屋作愛巢,再送百萬名鼓給他當玩具,當時夏韶聲不否認生活全靠老婆照住。

「間豪宅唔只有花園,仲有馬圈添,又可以對住個泳池作曲錄音。」食得鹹魚抵得渴,以自由換取駙馬爺生活,但夏韶聲受不了。

自資 40萬推出第五張發燒碟的夏韶聲,在訪問中承認與有米老婆 Tina去年已各走各路。

訪問當日,夏韶聲帶住兩歲細外孫 Kyle在身旁,肉緊時更要與他嘴嘴。活到 63歲,終把精神全放在孫仔身上。

婚前有協議

「大家生活唔同,我唔可以喺羅省匿喺個金雀籠入面,我唔係食呢啲飯嘅人。分開咗,我唔分佢家產,佢亦冇嘢分俾我,因為婚前我哋簽好晒協議。依家好開心,起碼想去邊就去邊。」

過往九年食慣歎慣,如今在香港租住幾百呎村屋,駙馬爺打回原形,習慣嗎?

「習慣,其實一間屋就算幾大,坐來坐去咪都係幾個位。離婚後我經濟係由零再開始,但冇問題!有時發夢都會見番間豪宅,因為嗰間曾經係我 dream house,裝修 idea我都有份,離婚後錄音室啲嘢同樂器我都冇攞走。要人啲嘢好麻煩,我寧願要自由。依家見番個女同個孫不知幾好,離婚好開心。我十九歲就結婚,到而家先有番自由, very enjoy,冇得頂,就算同 Tina嘅關係亦唔差。」

訪問當日,兩歲細孫 Kyle跟在身邊。冇女人,做公公的夏韶聲將全副心思投放在兒孫身上。在私人社交網站內,貼滿一張又一張兒孫的照片。

當日活到半百,還追求激情、閃婚,到今年六十三歲,終於如夢初醒,即使再遇黃昏戀,一定唔會簽字再做老襯。

「仲結?我個女都唔俾夫妻有幾多真係白頭到老,仲要多數老公死先,哈哈!遇到啱嘅都唔會結婚,唔好累人,人哋都唔好累我。(有冇異性埋身?)有,仲有人追我㗎。」

05年,夏韶聲拖住第四任老婆 Tina返港工作,當時兩人愛得痴纏。

只有第三任外籍前妻 BiBi能與夏韶聲的婚姻捱過十年。不過當年幫他帶大兩女兒的 BiBi,最後因梁詠琳介入傷透心。

在他的 fb,不時發現放着跟長女所生的大孫仔 Brandon及孫女 Rihanna的玩樂相,還配上對白,非常享受湊孫樂。

夏韶聲雖風流成性,但他對第一任老婆所生的兩個愛女非常疼錫,幼女 Michelle入產房,再度榮升公公的他到醫院陪伴。

做完訪問,他急住帶孫仔 Kyle到公園玩模型車,搖滾之父都有慈父一面。

愧對第三任老婆

四段婚姻,全部失敗,欠下一身情債的夏韶聲,願為前半生的風流賬補償。

「除咗第一個老婆,因我當年受唔住好多誘惑搞到分開,佢有埋怨我,但其他老婆,冇一個分開後話我唔好。(○五年第三任外籍妻子 BiBi,曾公開指夏韶聲風流,冇俾贍養費。)咁多個女人,分開後我都盡力照顧。雖然我唔係有樓俾人嗰隻,但只要佢哋有困難開到聲,俾得嘅都俾晒佢哋。我試過連屋企個櫃、電視機都拆埋俾佢哋。」

他口中照顧到底的女人,相信是第三任智利籍前妻 BiBi。據悉夏韶聲為補償曾因梁詠琳介入,帶給 BiBi的傷害,早前動用六位數字的積蓄,供對方渡

難關。

「你點知㗎!只要我有都會俾佢。只怪我當日處理感情唔好,三年前喺細女婚禮再見番佢,嗰晚我都匿埋喊咗一輪,咁多個老婆,唯一對 BiBi,我個心係唔舒服。」夏韶聲說。

一身情債的夏韶聲,承認對第三任前妻 BiBi感內疚。至於由拍檔變小三的梁詠琳,最後跟男方反面收場。

原名吳志坤的夏韶聲(左二), 79年推出唱片《童年時》爆出,雖然之後炮製多首名作《結他低泣時》、《空櫈》及《交叉點》,但紅歌唔紅人。

98年推出發燒碟《諳》後即被音響發燒友捧為天碟,為事業殺出一條血路。 09年在美國萬呎豪宅的錄音室炮製了創作大碟。

近年夏韶聲以 UFO題材寫了一個劇本,交予古天樂過目。「我同古仔係合拍《烈火雄心》時惺惺相惜,所以我將個劇本交俾佢保管,未知幾時會開拍。」

四段婚姻

87年跟 BiBi結婚,好友高志森及艷星陳奕詩有到場觀禮。

夏韶聲指曾有高人預言,他生命中有四個女人,他亦樂於將大半生情債,合理化地歸咎命運。

第一段婚姻,只有十九歲的夏韶聲與太太奉女成婚,二人育有兩女,婚姻維持了十年。由於當年有負另一半,夏韶聲曾在電台公開對前妻道歉。

第二任太太是美國人,維持了三年,第三任太太是智利籍的 BiBi,於八七年結婚,○三年因藝員梁詠琳介入導致離婚,當時 BiBi在傳媒面前哭訴,力指前夫負心,而成功搶人老公的梁詠琳最後同夏韶聲因財反目。

到第四任太太 Tina,是在溫哥華演出時認識,相識僅四天便定終身,婚姻維持了九年。



鍾意就快D Share啦!