探熱針
減產轉型 搞實驗室秘製咖啡 陳豪 Cafe五月開張大吉
一一年已在馬來西亞開咖啡店的陳豪，一直有意在自己地頭搞一間，踏入羊年，理想達到，新店預計五月開張；陳豪更花了近一年時間，在荃灣租了個工廈單位，作為研製咖啡口味之用。一絲不苟，都係唔想失禮街坊。
自設工場
鍾意咖啡到開埋鋪做老闆的陳豪，去年初已經着手為今年五月開張的香港店做準備。
「馬來西亞間咖啡店 Moses只係出個名就分到股份，所以只係掛名老闆，佢一直都好想喺香港開，仲要係自己打理嗰種。前前後後搞咗兩年，今年終於可以如願以償。鋪頭下個月開始裝修，五月開張，不過地點暫時保密。」知情者說。
作為咖啡迷，陳豪對咖啡的要求好高。為了控制品質，他更在荃灣的工廠大廈租了個單位，作為研製咖啡之用。
「 Moses係個咖啡癡，屋企係咖啡豆多過米！為咗開咖啡店，佢專登租咗個單位，搞咗個實驗室出嚟！門口冇公司名乜都冇，入面放咗好多部咖啡機，咁認真，一來想銷售有品質保證，二來係想研製一啲獨特口味，作為咖啡店招牌飲品。好多人都唔知個實驗室係佢嘅，好多嘢都係 Moses助手跟進。」有知情者說。
一年一劇
開鋪兼再做老豆，踏進羊年，陳豪已雙喜臨門。據知，近年已有減產想法的陳豪，計劃新店開張後，一年只拍一劇。
「 Moses想有多啲時間陪吓兩個仔，拍劇拍咗咁多年，係時候轉變一下，佢開得咖啡店就係開始想轉型，希望可以靠做生意搵錢，唔想再朝接晚，晚接早咁拍劇，冇晒私人時間；但佢唔會引退，只係一年拍一套劇，保持知名度。」知情者說。
|
鍾意就快D Share啦！
|
|
|