新一代姣精蔡思貝拍《衝線》時，嗒完周志文，再當眾幫羅仲謙扣皮帶。
探熱針
姣精 當楊怡冇到 蔡思貝幫羅仲謙扣皮帶
被形容為新一代姣精的蔡思貝（ Sisley），去年選完港姐後即被大台力捧，更有機會在新劇《衝線》中擔大旗做女主角；自恃鬼妹仔性格的她，拍《衝》劇期間嗒完「巨聲大孖」周志文，再打羅仲謙主意，主動「抄牌」約食飯，更當街當巷郁手幫對方扣皮帶，唔怕醜，更加唔放楊怡在眼內！
唔怕醜
發電廠蔡思貝入行只得一年，但緋聞名單頻頻更新，跟她合作過的鄭俊弘、周志文、麥秋成、沈震軒等，一律觸電。拍新劇《衝線》時，連名草有主的羅仲謙亦唔放過，明知對方有大個花旦女友，亦照放電，冇驚過！
「 Sisley恃住自己新，好鍾意詐傻扮懵，乜都捉住謙仔問一餐，有次埋位前仲無啦啦伸隻手去幫謙仔扣皮帶，現場個個睇住晒，佢都唔怕，反而謙仔就尷尷尬尬。」一名劇組工作人員透露。
姣功了得的蔡思貝亦出名白鴿眼，對住監製、小生黐得就黐，但對其他幕後工作人員，就表現臭寸。
「佢好叻㗎！會揀人嚟黐，淨係黐啲監製同男演員，好識做好識氹人，但對住啲 crew，佢覺得冇利用價值嗰啲就好寸好冇禮貌，人哋遞嘢俾佢，佢可以唔該都冇句，望都唔望。」
鬥假
去年，蔡思貝屈居陳凱琳（ Grace）之下只得亞軍，眼見公司亦較器重宿敵，更加唔忿氣，實行「開咪」四圍唱對方「世界女」。
「 Sisley覺得自己冇嘢輸俾 Grace，咪成日話自己唔夠人哋咁世界女，冇人咁進取；不過 Grace都唔弱，佢知 Sisley喺外面係咁唱佢，但見到面兩個繼續攬頭攬頸，都好假。」知情者說。
|
鍾意就快D Share啦！
|
|
|
