俾任達華笑貪靚嘅吳鎮宇電咗髮之後，髮型幾乎同 Chilam一模一樣。
同你吟一吟
吳鎮宇電髮扮 Cool魔
一年一度，由貿易發展局牽頭嘅「香港影視娛樂博覽」，星期一（三月二十三日）開鑼，多間電影公司擺檔賣片同公布年度製作大計外，仲會乘機晒冷，宣傳即將上畫嘅新片。
是日有份出席活動嘅演員近乎全男班，其中以太陽娛樂《殺破狼Ⅱ》陽氣最盛，包括古天樂、 Tony Jaa、吳京、任達華、張晉、林嘉華、姜皓文、 Baby John、恭碩良、盧惠光…… man到呢！
芸芸壯丁中，就以繼《盂蘭神功》後再次自導自演，開拍《陀地驅魔人》嘅張家輝最出位，一頭銀白髮，型爆！為咗新戲造型，張家輝要剃光頭戴假髮，慳時間又唔使成日漂住咁傷，不過就俾囡囡 Brittany話佢冇頭髮好醜樣。
除咗張家輝，用個頭嚟搞花臣嘅仲有代表英皇《衝鋒車》落場，電咗髮嘅吳鎮宇，雖然冇晒《衝上》 Sam哥「朕除」，但失驚無神變咗 Cool魔，好邪！
|
鍾意就快D Share啦！
|
|
|
