2015年3月26日 星期四

月租七萬 充大頭住淺水灣 麥包撲水填氹 [壹週刊 - 1307] 麥包,麥長青,M1,



出名錫屋企人的麥包,載囝囝返學校,父子在學校逗留個多小時,老婆則一直留在車內等候。

探熱針

月租七萬 充大頭住淺水灣 麥包撲水填氹

八七年入無綫的麥長青(麥包),一直做配角撈唔起,一○年憑《巾幗梟雄之義海豪情》獲最佳男配角獎後,竟試過接近一年冇工開,好睇唔好食!去年中,見朋友做 iPhone生意有利可圖,有指他不惜向財務公司貸款七百多萬,企圖照辦煮碗賺一筆。人算不如天算,炒燶 iPhone之餘,麥包因為聽風水師指示,搬到月租七萬淺水灣風水屋,搞到百上加斤,要交租又要還「財仔」的他,除了開口問圈中好友借錢,更要向內地中介人預支騷錢,狂跑夜場,撲水填氹。

蝕入肉

因為「非凡哥」一角成為「最佳男配角」後,麥長青雖然人氣升,但有名無利,攞獎後更加十個月冇工開;一個人孭起頭家、一對仔女、麥包媽和外母,近年月薪加到兩萬幾的他,多年來一直要兼職搵外快,偶然投資搞生意,也多是損手離場。

據了解,去年麥包決定投資七百多萬入 iPhone 6,是因為眼見身邊人可以一炮過賺七位數,於是有樣學樣,心雄押重注。

「嗰個係苗師傅(圈中人御用風水師)身邊其中一個跟咗佢好多年嘅女信徒,舊年六月,個女人掟咗成千萬入 iPhone 6,第一轉就賺咗四百幾萬,見人哋搵得容易,麥包就問苗師傅自己有冇呢啲賺錢機會,後來佢就借咗七百萬入咗一批貨,點知 iPhone 6十月已經喺內地正式發售,所以佢坐晒艇。因為初時諗住賺硬,所以麥包仲預埋契妹(陳茵媺)份,不過 Amiee投資好少,唔似麥包蝕入肉。」知情者說。

上週六,麥包陪囝囝返學校出席家長日後,一家三口再到太古城商場醫肚 shopping。



麥包現以七萬元月租的淺水灣道 37號,與 Do姐為鄰。

本月 11日晚,麥包由日本做完嘢返港,由同行的麥太揸車返淺水灣豪宅。

搬住淺水灣

跟隨苗師傅多年的麥包,去年更自我升呢,由月租二萬的深井碧堤半島,搬到月租七萬的淺水灣豪宅。

「麥包一向都好信呢個師傅,過去幾年,佢同黎耀祥都係搵苗師傅睇風水,見祥仔攞咗三屆視帝,跟住又買屋買波子,麥包覺得係時候輪到自己,所以苗師傅提議佢搬去淺水灣,佢就即刻跟住做。」

屋漏兼逢連夜雨!有指麥包既要負擔屋租,亦開始被「財仔」追數,十個樽兩個蓋,他唯有向圈中好友借錢,又跟內地夜場中介人預支騷錢,跑數填氹。

「麥包同幾個相熟嘅中介人講自己之前做生意輸咗好多,要錢填氹,叫人哋預支騷錢俾佢,五個中介,每個俾咗兩場錢(五萬人仔一場)佢,幫佢一次過冚咗六十幾萬,不過之後麥包就冇得議價,人哋一叫到,佢就要返內地唱,就算大時大節,都冇得加價。」知情者說。



麥包搵中介墊支後,上月他返內地做了幾場騷,其中一場跟楊娜一齊演出。

月中,麥包又孖住高海寧去大阪做旅遊節目。

做內地騷跑數

陳茵媺榮升人母後,她跟早已有一仔一女的麥太來往更頻密。

契妹陳茵媺未跟陳豪拍拖前,麥包已經間中拍住女方一齊在內地做剪綵嘉賓搵銀。

攞完獎,麥包竟然十個月冇工開,原來未得獎前,他更諗過轉行離開娛樂圈。

搵唔到食

對於有消息指他貸款七百萬炒 iPhone,以及向圈中人借錢還債,麥包在電話中一律否認,只強調拍劇搵唔到食。

「我又唔係一線,公司唔係吓吓有嘢俾我拍,一家都要食飯㗎,啱唔啱先?以前做《傳真機》嗰陣唔係咁多人識,都有做其他生意,仲試過賣迪士尼精品,做水貨客。(好耐冇拍劇?)等公司安排,我控制唔到,唔係我叫公司就俾,點解我鍾意做生意,就因為主動啲進取啲。不過我冇話公司對我差,對 TVB,我只有多謝同感恩,唔會有任何怨言。」

至於愈住愈豪,麥長青解釋:「都買唔起樓,不如住好啲!我鍾意享受屋企生活,大部分都投資喺住方面,環境好,自己都開心啲。」

自言唔多劇拍的麥包,近日只有跟岑麗香主持的飲食節目出街。

麥包跟張兆輝識於微時,兩位老婆亦情同姊妹,有指麥太也有向張太開口救急。

麥包早前頂替歐陽震華執二攤拍《守業者》,再跟馬浚偉傳出不和,不過二人例牌否認。

去年 8月,麥包稱收百萬酬勞替英皇大道商場擔任推廣策劃總監。

麥包入行時跟朱茵、譚玉瑛等一齊主持《傳真機》,得四千蚊人工的他,自言做過水貨客賣迪士尼精品。

星級風水師

苗師傅是娛樂圈人包括古天樂、張智霖、袁詠儀、黎耀祥、陳豪等御用風水師,經他指點,大家都愈搬愈豪,愈住愈富貴。

古天樂

近年接戲接唔停的古天樂, 09年聽從苗師傅指點,搬離何文田京士柏山,以過億購入貝沙灣獨立屋,更由苗師傅擇吉日吉時拜四角增運勢。

黎耀祥

追隨苗師傅多年的黎耀祥,攞足三屆視帝,但年前擔正電視劇《神探哥倫布》仆直後,即聽苗師傅指示曬黑皮膚,並搬入上水獨立屋。

陳豪夫婦

坐正大台一哥後,搵苗師傅睇風水的陳豪由住開的深井碧堤半島,搬去大埔四千呎比華利山獨立屋。

張智霖、袁詠儀

張智霖跟老婆袁詠儀多年前跟苗師傅指示搬入淺水灣豪宅,每月又會跟隨大隊出海放生,做功德積福。

投資運差

麥包去年獲重金禮聘為北角一個商埸擔任推廣策劃總監,原來入行廿八年的他除了在無綫拍劇外,多年來亦搞過不少投資項目,可惜每多失利收場。

90年代 在訪問中講自己炒燶股票

2000年 跟朋友在東莞搞食肆,但業務未如理想,最後蝕六位數字離場。

06年 曾以免租一個月,碌盡人情卡請一班圈中人如陳浩民、麥家琪、姚樂怡及蕭正楠等,在旺角東京銀座廣場開鋪賣 T恤波鞋,試圖打造「星光大道」的藝人店鋪街,不過開業兩個月,便執笠收場。

06年 替「鋪王」鄧成波擔任鰂魚涌水族廣場的項目總監,但效果未如理想。

鍾意就快D Share啦!
Related Posts Plugin for WordPress, Blogger...