2015年3月26日 星期四

《愛•回家》失和 郭少芸徐榮雙打林漪娸 [壹週刊 - 1307] 林漪,郭少芸,M1,



劇中馬家好溫馨,但戲外郭少芸與徐榮同一陣線,唔妥「大嫂」。

探熱針

《愛•回家》失和 郭少芸徐榮雙打林漪娸

一直以馬家成員作為故事骨幹的長命劇《愛•回家》,終於宣布拍到八百集收檔。「一家人」對足三年,鏡頭前親情洋溢,但實情「馬家」早已分裂,當中「大嫂」林漪娸因私自調動拍攝檔期及埋位交行貨,年多來受盡「老公」徐榮同「孻姑」郭少芸混合雙打,其後更有部分馬家成員加入杯葛行動。但講到尾,林漪娸自己攞嚟!

不滿戲屎

成為馬家上下眼中釘,源於「大嫂」林漪娸恃住同製作部太后珍姐曾勵珍老死,不時要求 PA改動拍攝時間遷就自己,結果觸怒因調動而受影響的同場演員。性格巴辣的「孻姑」郭少芸,從此視「大嫂」為目標,無論在服裝間碰面抑或埋位對戲,郭少芸便毫不客氣,黑面、針對,辣招百出。

後來郭少芸跟《愛》劇編審邵麗瓊成姊妹淘,加上亦被珍姐寵倖,勢均力敵,於是將唔妥「大嫂」行動升級,不時當眾呼喝林漪娸。

為避開郭少芸,林漪娸寧願獨自開餐,對馬家所有飯局,她甚少參與。

玩住波子棋等埋位的馬家上下,冇「大嫂」林漪娸份。

跟出名巴辣的郭少芸不和,冇力反擊的林漪娸唯有忍氣吞聲。

開大會照肺

俾郭少芸玩到盡,林漪娸更因為交行貨,得罪埋「老公」徐榮,「孻姑」同「老公」更變成自己友,聯手玩雙打,杯葛林漪娸。

「珍姐之前開大會,對住老友都一樣冇面俾,當眾照漪娸姐肺,雖然之後佢唔敢再亂調開工時間,但同 Florence(郭少芸)嘅關係根本冇改善過。 Florence試過對戲兜口兜面質佢:『林漪娸,企開啲』佢兩個鍾意襯頸巾出鏡, Florence又會喺服裝間寸爆話:『人著乜佢又著乜!』總之十寃九仇咁!至於徐榮,鏡頭前同『老婆』好恩愛,私底下已經唔瞅唔睬。」知情者爆。

《愛》劇拍至尾聲,有傳林漪娸一度主動求和,但寸嘴的郭少芸唔領情,一於拒絕。

因與珍姐友好,所以就算林漪娸戲屎,爆騷的處境劇必預佢一份。

求和食檸檬

林漪娸成為眾矢之的,在馬家中唯一可以有傾有講得「老爺」兼高爾夫球波友劉丹。至於「叔仔」黎諾懿及「乖仔」羅天宇則屬中立派,反之一度被踢出「家」門,年初回歸的「馬子妮」蔣家旻,見「孻姑」勢強,已埋堆做自己友,對「阿媽」林漪娸態度冷淡。

據悉,珍姐為免被唱包庇老友,對林漪娸與「馬家」的私人恩怨從不插手干預,無人撐,加上性格怕事,林漪娸唯有忍氣吞聲。眼見頭家就快散,有指林漪娸一度主動求和,卻遭郭少芸拒絕。

「有次 Florence拍完場戲唔記得攞番件褸,漪娸姐見到幫佢攞, Florence一句唔該都冇,望都唔望就攞番行咗去。過去一年來,漪娸姐放午飯都係自己一個人食。」知情者說。

本月中《愛•回家》搞活動,徐榮跟林漪娸扮 friend宣傳。

有指郭少芸之前亦嫌棄對手吳家樂交唔到戲,拍到發𤷪憎。

《愛》劇最早傳不和的,是演情侶黎諾懿與朱慧敏。

有傳黃子雄曾向監製投訴,跟對手姚瑩瑩感情戲冇火花,最後姚瑩瑩淡出此劇。

合久生怨

處境劇一拍數年,遇上唔啱嘴型或麻煩對手,往往久合生磨擦,同事變仇家。

張兆輝 商天娥

12年合作《結•分@謊情式》,商天娥經常遲到兼黑面犯眾憎,甚至跟「老公」張兆輝及台前幕後炒大鑊。

薛家燕 苑瓊丹

03年合作《皆大歡喜》時裝版,被指擺阿姐款的苑仔,定下 NG及遲到罰款條例,有次家燕姐被苑仔指責遲到,最終演變成罵戰。

梅小惠 趙學而

01年《皆大歡喜》古裝版,二人戲裡戲外爭寵爭戲份,埋位時經常互寸,之後更反晒面冇偈傾。

鍾意就快D Share啦!
Related Posts Plugin for WordPress, Blogger...