2015年3月26日 星期四

假戲真癲 癲佬上身 劉青雲肉搏葉璇 [壹週刊 - 1307] 劉青雲,葉璇,青雲,M1,



探熱針

假戲真癲 癲佬上身 劉青雲肉搏葉璇

向來是爾冬陞御用演員之一的劉青雲,在他監製的新戲《暴瘋語》入面,對手由見慣見熟的古天樂、吳彥祖,變成黃曉明、葉璇,一樣無阻影帝演技發揮。劉青雲曾經講過,假戲真做先有真實感,令觀眾更容易投入,所以在《瘋》片中跟葉璇的對手戲,劉青雲癲佬上身,出盡全力箍實葉璇條頸再掟佢出窗,像真度極高,但代價換來葉璇頸紅手腳瘀青,事後劉青雲要不停「耍冧」。

假戲真做

癲佬青雲出盡力箍頸,搞到葉璇周身瘀晒!

憑電影《暴瘋語》再次在「金像獎」提名最佳男主角的劉青雲,戲中扮演精神分裂病患者。導演李光耀在開拍前,要求青雲不要「為癲而癲」,必須收起《神探》以及《奪命金》入面的誇張表情,青雲坦言有一定難度,而令他最印象難忘的場口,莫過於跟葉璇合演的殺妻情節。

「呢場戲交代我要用暴力,要有真實感,一定要真打落去。如果大家睇呢場戲嘅時候,發現劉青雲係人渣,永遠要住喺精神病院,唔會同情呢個人,咁先叫成功。」劉青雲說。

要做到最好,青雲同「老婆」葉璇提出假戲真做,見女方話「放膽落手」,青雲果然「嚟真」,用盡全力箍實葉璇條頸,再拖佢埋窗邊掟落街。導演嗌 good take收貨,可憐葉璇條頸紅晒,手腳亦因過度掙扎,瘀傷處處,難怪葉璇都話:「真係俾青雲嘅表現嚇親!」

對於拍檔投以百分百信任,青雲好感激:「真係好多謝葉璇交足功課,做得好好,亦都真係付出好大代價,見到佢手手腳腳有傷,自己都唔好意思,掉番轉,佢仲同我講冇事,怕我擔心。」

青雲應導演要求收起誇張表情,演活精神分裂者角色。

為求真實感,青雲對葉璇動粗,拳拳到肉。

飾演葉璇母親的鮑起靜,獲提名今屆金像獎最佳女配角。

首拍黃曉明

古天樂膽拖吳彥祖,是劉青雲近年的鐵腳拍檔,今次對手變成黃曉明,連青雲都忍不住說:「終於唔再係古天樂!」兩人首度合作,加上青雲拍戲出名認真,即使休息時間,一樣長期黑面,令黃曉明大叫怕怕。

「佢(青雲)真係我心目中嘅男神——經病!開工時日日俾佢碌大眼望住,埋位又兇神惡煞,初期真係驚咗佢!」黃曉明說。

入行超過三十年,劉青雲近年所演繹的角色愈來愈沉重,以前更試過因為抽離唔到角色要睇心理專家,好在有太座郭藹明貼身睇實兼提點。

「只要同你鍾意嘅人一齊,就會令你跳出銀幕,返回現實,所以拍呢部戲我成日都問太太『我有冇事』,如果我有異樣,太太會提醒我,我好放心!」青雲說。

對手是青雲,唔敢放軟手腳的黃曉明,一度過分投入,抽離不了角色。

開工期間,青雲要保持「癲佬」狀態,嚇到黃曉明喊驚。

上星期青雲憑《竊聽 3》,獲香港導演會頒最佳男主角。

鍾意就快D Share啦!
Related Posts Plugin for WordPress, Blogger...