張震添千金：不可思議
結婚一年多的台灣型男張震昨日報喜，自爆家中有新成員報到！老婆莊雯如終誕下張家千金，出世不久的B女已是美人胚子，靚樣盡顯父母良好基因！
SoSo姐金句：生女歡天喜地，群星讚到飛起！
台灣男星張震前年年底與拍拖4年的助手女友莊雯如拉埋天窗，兩公婆努力「造人」，結婚未夠一年，去年10月爆出張震老婆已懷孕3個月。直至昨晨，莊雯如終於公布喜訊，平安誕下小千金，恭喜恭喜！
張震昨晨在微博上載BB腳印相，宣布升呢為新手爸爸，並興奮留言：「新成員報到！」而莊雯如亦在網上開心Share B女靚相，見BB戴着粉紅色帽仔，瞓覺時更舉起一雙小手，面珠紅粉緋緋及五官標致，甫出世便盡得爸爸媽媽的良好基因！開心榮升「大伯」的張震哥哥張翰，更拍下B女腳印相，全家上下都喜獲新成員加入！
微博騷BB車相
張震事後亦透過經理人與大家分享初為人父的喜悅，張震說：「覺得很不可思議，很開心，母女都很健康，謝謝大家關心。」而早在去年11月，預備做老竇的張震不僅全面停工，專心照顧老婆，更做足準備，買定嬰兒用品，他更曾在微博騷BB車相，大晒慈父樣！
其實張家小千金未出世已相當好腳頭，皆因去年10月張震先入圍金馬獎角逐最佳男主角，其後又在今年年三十晚的央視春晚中一枝獨秀，彈着古琴登場，再「一代宗師」上身大耍八極拳，被讚是全晚亮點兼有姿勢有實際。似乎B女旺爸之餘，更令張震名氣財源滾滾來！
羊年密賺奶粉錢
其實張震出身演藝世家，其父張國柱為台灣資深演員，縱橫影壇30多年，而哥哥張翰更是演而優則導。過往張震拍戲時，更是好學不倦，難怪被冠以「學霸」的美譽！未知張震會否想囡囡繼承衣鉢，栽培她做女版張震！
另外，好爸爸張震羊年亦要密密做，賺盡奶粉錢養家，所屬的公司亦透露張震先要忙於宣傳新片，兼且洽談多個劇本：「有好多劇本睇緊，嚟緊要宣傳新戲，《道士下山》、《赤道》、《聶隱娘》。（吳京搵佢拍戲？）都好想同吳京老師合作，仲有好多嘢傾緊。」
SoSo姐金句：生女歡天喜地，群星讚到飛起！
|
鍾意就快D Share啦！
|
|
|
