橫店直擊
樊少皇喺餐廳全程黑面，反而出到門口即刻變臉笑晒，仲識擔遮照顧女友 JJ。
真面目
抱狗連體 賈曉晨樊少皇食茶記慶元宵
少時允兒有林更新陪住行孖咇；同在橫店為另一劇集開工的 JJ賈曉晨和樊少皇，更加黐到實。其實兩人 12年撻着，期間是非多多，一時傳出 JJ係第三者破壞樊少皇家庭，一時又傳兩人分手，極速玩完。
你有你鬧，當事人反而打風打唔甩，最近齊齊在橫店，接拍由吳奇隆投資的古裝大片《蜀山戰紀之劍俠傳奇》，攞正牌拍拖。不過對得多當然有反效果，本刊在橫店發現樊少皇唔多理 JJ，元宵佳節當日，冇燭光晚餐唔在講，更全程黑面！唔通 JJ呢排冇請男友去旅行，搞到力王唔高興？
41歲樊少皇同 32歲 JJ拍拖 3年，一度傳出男方為 JJ拋妻棄女，令一向正氣的「力王」形象插水， JJ亦慘成小三，兩個攬住衰！
一家三口多隻狗
事過境遷，樊少皇同 JJ愈來愈恩愛，兩人近期更以情侶檔演出內地劇《蜀山戰紀之劍俠傳奇》，孖住賺人仔。
但又點估到，月初元宵正日（ 5日），兩人竟在橫店一間港式茶餐廳做節，期間樊少皇全程黑面，又掛住篤電話，即使 JJ出盡力喪撩，樊少皇都係敷衍望兩望，戲都懶得交！食食吓仲巨星上身戴埋超。悶足成餐飯，樊少皇留低女友同隻狗，一支箭衝去埋單，同老闆娘反而有講有笑。比起之前唧都唔笑個樣，分分鐘以為老闆娘先係樊少皇條女呀！
JJ又送禮
有車有樓的 JJ，除了同樊少皇共同享用財產之外，仲貼埋錢請男友旅行，先後去過澳洲同歐洲，連樊少皇都曾經講過環遊世界要靠女友！貴為圈中小富婆， JJ在剛過去的情人節，又要做送禮勤，出招冧男友。又有禮物收的樊少皇亦好識做，即刻上微博晒命。搵到個富婆做女友，又確係值得晒嘅！
|
鍾意就快D Share啦！
|
|
|
