【短片】【與成龍剪不斷理還亂】獨力湊大卓林 吳綺莉：我唔照顧佢邊個照顧佢呢
2015-03-16 23:31:00
吳綺莉女兒吳卓林出世不久，兩母女選擇定居上海？吳綺莉接張學潤訪問時解釋：「因為我會覺得，如果唔係咁，0依家嘅佢更難受，嗰時我覺得輿論壓力，就算呢件事，每人有唔同諗法，我都今刻有時未承受得到，係咪先？如果乜都畀人講，擺喺度你睇啦，做一百件好事冇用，少少嘢已經夠，咁輿環境下，我覺得一個小朋友會承受唔到。」
有傳吳綺莉當時選擇赴上海，係收夠錢去無憂無慮生活？吳綺莉嘆謂：「唉﹗你知我由細到大唔鍾意解釋，每一段感情﹑朋友同事關係，一隻杯係敲唔響，一件事唔係一個人錯或啱晒，呢個係我由細到大concept大，NO ONE CAN BE PERFECT，我冇資格評論別人啱唔啱，呢個女我生出嚟，我唔照顧佢邊個照顧佢呢，我想問？」
咁喺上海幾年做乜呢？吳表示：「幫朋友裝修，自己屋企都係我裝修﹑仲有畫畫及設計，如果唔係開唔到畫展。」咁點解選擇返港？吳表示：「佢（囡囡）喺傳媒壓力下，我覺得佢完全承受到，我要生活工作賺錢，我生活唔需要同人交代，有乜好解釋？拍拖嘢你情我願，過咗去就過咗去。」
講到同成龍剪不斷關係？問到係咪從冇埋怨任何人？會唔會厭倦成龍新聞纏住你？吳綺莉就話：「每一個人條命，每人遇到嘢唔一樣，我厭倦唔係厭倦人，如果你問我，對我自己會好攰，我唔鍾意吳綺莉呢個人，我真係成日我好攰，一聽到吳小姐好厭惡。」
咁心裡有冇怪呢個人？佢話：「我冇怪任何人。（作為單親媽咪，有經濟壓力？）全部嘢都有壓力，成個PACKAGE似聖誕節送畀你。（最唔鍾意邊個？）我最唔鍾意我自己。」
考慮做另一角色？改名？或做另一行，吳綺莉苦笑：「我成日話我五呎十吋高，行出街笠住紙袋，人哋都會望下呢個係邊個啦，我離唔開娛樂圈，呢世走唔到，有啲嘢改變唔到，冇得改，唯一心裡最唔舒服，就係做我自己做到好攰。」
吳綺莉也不諱言想搵番個伴，但只可以隨緣。問到會否為咗個女識第二個？或者經女兒過目？佢話：「早十年我要Spend時間喺囡囡身上，因為佢有缺失，佢冇咗嘅嘢，我生得佢出嚟，無論乜嘢都好，唔關佢事，唔係佢錯，冇需要承擔冇必要嘢，呢一兩年冇以前睇得咁細，我0依家同個女一齊面對，大家照顧大家情緒。我會努力工作，諗少啲嘢，飲少啲酒。」
(有線娛樂新聞台截圖)
吳綺莉作為單親母親，獨力湊大卓林。 (有線娛樂新聞台截圖)
(有線娛樂新聞台截圖)
|
鍾意就快D Share啦！
|
|
|