劇中黃德斌做劊子手，有唔少佢斬人嘅情節，明明喺古裝但大台都竟然諗到同 ISIS（伊斯蘭國恐怖組織）有關，認真好想像力。
真面目
嚇自己 TVB嫌血腥似 ISIS 黃德斌斬頭劇被禁變倉底
大台最叻係維穩，政治敏感少少嘅都唔俾出街，最新受害者係今年上位做男一嘅黃德斌。捱咗 22年嘅黃德斌食住大台鬧小生荒，擔正拍《刀下留人》飾演劊子手，經常有斬頭情節出現，不過大台節目部睇完即刻驚青，竟然聯想到同伊斯蘭國斬頭片段，怕觀眾不安，下令要刪減斬頭情節，否則上映冇期。
51歲黃德斌喺大台由茄喱啡做起，捱足 22年，今年食正小生荒，即上位做男一先拍《當鐵馬遇上戰車》，劇中同新貴蔡思貝談情，接住即為《刀下留人》開工亦係做男一，原本前途一片光明，但《刀》劇隨時因場面血腥而變倉底。
要大量刪斬戲
據知《刀》劇慘變倉底原因，主要係節目部見《刀》劇中有好多斬頭血腥場面，更有人頭滾地畫面及斷頭大特寫，節目部高層睇完就驚好容易令觀眾諗到近年伊斯蘭國將人質斬首片段，所以勸劇組刪減斬頭場面否則出街冇期。
劇中男一黃德斌就唔覺太血腥，他說：「公司開得拍得應該計好數啦，我又唔覺咁血腥喎，我都係煞科冇耐，𠵱家咁快話擺倉底？唔好啩。我哋拍嗰陣又冇話賣弄血腥，電視有幾激呀！」孭重飛劇集隨時變倉底，而德斌原定拍《 EU超時任務》繼續做男一，但因為要為《愛．回家》埋尾撞期，劇組唔等另搵王浩信頂上。他說：「冇計都撞咗期，人哋冇可能等你成個月唔開工。」德斌認真黑仔。
|
鍾意就快D Share啦！
|
|
|
