探熱針
「大食」周志文屢勸不改 樂易玲落令炒魷
「巨聲大孖」周志文，○九年出道至今，食女多過做嘢！一一年跟有米女友 CoCo袁聖殷撻着同居，就算有人照顧，但返內地和馬賽合作拍劇又搞上；一腳踏兩船小兒科，食女癮大的他，近年更連環𠝹五女，偷食發電機蔡思貝外，更被目擊跟劉佩玥（ Moon）在夜店狂嘴，同時間又對陳瀅、吳若希以及何雁詩狂攻。
唔熟唔食，大孖周志文終於出事，被樂易玲下令炒魷。
驚動樂大媽
周志文同孖生細佬周志康同期出身《超級巨聲》，細孖去年奉子成婚榮升老豆，未有機會出唱片的大孖，則繼續拍劇做三、四線配角，但因為得到有米女友 CoCo眷顧，即使搵錢有限，一樣可以用名牌住豪宅，享受一流！有米女友唔嫌棄，但一二年大孖跟當時備受力捧，在《名媛望族》做夫妻的馬賽卻假戲真做，搞到 CoCo要親飛上海監場，甚至公開大鬧小三，事件更驚動大媽樂易玲，雙雙被照肺。
守行為一年，大孖去年又「出手」，跟蔡思貝在台灣拍《衝線》外景搞搞震，借醉留對方過夜。
「佢哋雖然唔認，不過思貝返到香港都有繼續搵大孖，但明知思貝俾公司捧緊，大孖驚又出事，所以玩完一輪就算。」知情者說。
借酒意嘴晒
身經百戰，「獵食」技巧愈來愈精的大孖，甚至同時睇中《四個女仔三個 Bar》幾個女主角。
「後生仔女，好多時都有 gathering，大孖同 watt數最高嘅阿 Moon（劉佩玥）最玩得埋，試過唱 K飲到 high high哋，當住好多人面前嘴晒。至於陳瀅，唔少人都覺得佢正，好似沈震軒同胡鴻鈞都嗒糖，但就得大孖一個做到出晒面，成日借人哋隻狗過橋約佢見面，不過陳瀅有個圈外男友，所以冇騷佢。」
監製開會表態
夠膽亦要懂得把握時機，早前吳若希母親意外跌傷入院，大孖又趁機出手搏好感。
「大孖初時係同大隻仔（溫家偉）去醫院探 Jinny（吳若希）媽咪，諗住搵位獻殷勤，不過 Jinny係 Herman（唱片部話事人）愛將，已經出晒聲叫佢彈開，但佢仲未知火燒眼眉，連何雁詩都唔放過，知道人哋最近甩拖去旅行散心，竟然主動到話陪玩，何雁詩冇睬佢，但佢同 Jinny都係 Herman嘅人，之後大孖咪俾高層警告囉。」
大孖將大台班姐仔當「靶」，早在馬賽事件，已睇他唔順眼的樂易玲，早前便召開聲討大會，要各大監製表態，斬草除根。
「樂小姐問晒啲監製，話如果認為大孖仲有得做，可以俾多次機會佢，但竟然冇一個監製話會再用，所以樂小姐諗住同佢解約。大孖都聞到味，仲主動約樂小姐傾偈，睇吓拆唔拆得掂。」知情者說。
色禍
色字頭上一把刀，大台懲罰旗下桃色出事男藝人亦從不手軟，第一時間大減工作量，再慢慢消失。
梁榮忠
05年背拍拖七年女友鍾麗淇同朱慧敏玩車震，女主角即時被大台雪藏，形象插水的梁榮忠之後再被踢爆與朱凱婷、袁彌明過從其密，自此一沉不起，唯有離開大台，轉做舞台劇及幕後工作。
專吼財女
周志文識揀識食，獵食對象有樣有身材之外，部分更是有家底又或者本身搵銀能力強，專吼財女，大孖數口好精。
CoCo袁聖殷
以女子組合 LemonBeez加入樂壇，屋企人在上海營商， CoCo在港住貝沙灣，出入平治跑車，對男友大孖，送名牌禮物冇手軟，甚至全包請去旅行。
|
鍾意就快D Share啦！
|
|
|
