早前霆鋒為新戲拍攝追賊場面，全程保持一號表情， chok！
探熱針
睇拍戲 影帝謝霆鋒 Chok住碌地捐車底
劉青雲和謝霆鋒兩個影帝合作的新戲《驚天破》，要在上海、泰國、台灣巡迴取景外，上月尾，劇組拉隊到七•一「重災區」龍和道一帶取景，片酬要千五萬起跳的謝霆鋒，又碌地又捐車底，全部親身上陣，但點郁都好，卻不忘時刻保持一號表情， chok！
龍和道埋位
飾演警探的謝霆鋒，和扮演犯罪心理學家的劉青雲，一文一武，聯手破案；戲中的動作戲份，郭子健全部交俾霆鋒，大部分動作戲都是親身上陣。
「劇組幫霆鋒買重保險外，佢自己都有加大保額。因為有大量動作戲，原本身手都好靈活嘅霆鋒，埋位前兩個月專登去咗學功夫，做足準備；除咗打得，佢仲要睇得，試造型都要試幾次，有啲戲服仲係私伙。」一名劇組人員透露。
早個禮拜（四月二十六日），劇組在金鐘龍和道一帶拍外景，黃昏時分，穿著黑色西裝的霆鋒在助手陪同下現身，埋位前，先跟動作指導試走位，現場所見，他不時指手畫腳，提出意見，試位時亦瞓晒身，冇偷雞；試了兩次便正式拍。由救護車跳下追捕疑犯的霆鋒，要跨過一部私家車，瞓身碌落地再捐入車底。等導演叫 roll機，霆鋒已經一副 chok樣，完成連串動作後，依舊保持同一個表情， chok樣冇變。只拍了兩 take，導演便滿意收貨。
停機歎雪茄
走埋攝影機旁睇 playback的霆鋒，下意識擺出 chok pose，擔住雪茄跟導演交換意見。
餘下來的鏡頭都非常簡單，霆鋒行行企企，輕鬆一兩 take，導演便收貨。
拍到晚上十一點半，最後一場在香港取景的戲份搞掂，謝霆鋒大叫：「收工」十足老細款！
|
鍾意就快D Share啦！
|
|
|
