好嘢嚟㗎，飲支少支。﹙設計對白﹚
爆壹爆
港男港女面交炒威士忌
愈來愈多人轉玩威士忌，早前幾個威士忌拍賣會銷情大好，搞到酒價又急升幾倍，形成全城熱炒威士忌之象。一支日本羽生伊知郎撲克牌系列的彩色 Joker都炒上一萬二千元成交，絕版輕井澤更炒到廿幾萬，就知個熱潮好勁。
大型拍賣會炒，網上私人拍賣網一樣瘋狂，同一支 Joker威士忌，直接購買價更達一萬四千二百元，比拍賣會的成交價仲要高。爆哥於是相約其中一個私人炒家出來，仲解開咗熱炒之謎。
呢個炒家阿文承認，係拍賣會不斷谷高個價。「我哋一直都會去日本捐窿捐罅搵（日本威士忌）返嚟，未炒到咁熱嘅時候，只係（港幣）幾千蚊一支。只不過全世界都用咗拍賣行個價做標準，拍賣會完咗，就跟隨加價，連帶日本嗰邊本土貨都貴埋。」佢仲聲稱手上支 Joker威士忌，在尖沙咀其他酒鋪，開價仲誇，二萬八千蚊一樣有人買。爆哥初時懷疑拍賣會支酒同私人炒家放出市場嘅係同一支酒，塘水滾塘魚咁不斷來回造市炒高，但對過阿文手頭支酒身編號，又唔一樣喎。
同佢吹完水之後，爆哥玩跟蹤，發現阿文急急腳走去港鐵站，原來趕去港鐵站見另一名港女，仲幾靚吓。兩個人一手交貨，一手交二千蚊，呢類網上約出來交收形式叫「面交」，即當面交易，話咁快就交收咗一支日本余市 20年，真係好鬼熱鬧咁。
十三太保普通話唔掂
爆哥之前上網聽過曹仁超普通話訪問，如果唔睇字幕，爆哥真係唔知佢講乜。但估唔到一山還有一山高，昔日 14K「慈雲山十三太保」嘅成員高飛，即係李兆基，早前同佢昔日江湖大佬陳慎芝接受鳳凰衞視專訪，節目仲登咗《壹》仔去年訪問陳慎芝同佢江湖兄弟嘅報導。
講番個電視訪問，基哥用盡力以普通話回答，不過聽真啲，爆哥都唔知基哥講緊廣東話定普通話定日文，例如佢話去靈堂道別昔日兄弟貓仔，佢就用普通話答：「好多警橙到奔儀館外面，每一個到來都要『趴埋牆』登記。」又將「慈雲山十三太保」讀成「痴 one山十三太保」再高兩個 key，真係聽到你兩眼反白。
五十九歲嘅基哥夠晒可愛，佢同爆哥傾電話，佢話呢幾年經常返大陸登台，所以「訓練」到普通話喎，不過佢最近輕微中風，要喺屋企抖吓，過幾個月先返大陸表演喎。
搭直升機幫洗米華剪髮
人有起錢上嚟就乜都得，但又偏偏回味未發達時生活。講緊澳門賭業猛人洗米華，條友對女人多情就係人都知，但原來佢對髮型師就好專一，由年輕到而家，都係幫襯開同一個髮型師，未變過。
有髮型師爆料，話早在十幾廿年前，洗米華仲來回澳門同香港搵食嗰陣，已經指定搵一個髮型師幫佢剪頭髮，話剪得佢靚仔又好意頭咁喎。就算後來洗米華專心去澳門做疊碼仔，都會定期返香港搵佢剪髮。而家洗米華做咗大亨又鬼咁多女，身家億億聲巴閉啦，忙到七彩，打理幾十樣生意之外，又要陪老婆同紅顏知己，邊有時間返香港剪頭髮。為咗 keep住個靚靚蛋撻頭，每隔兩個星期，洗米華就會叫嗰位香港髮型師，坐直升機去澳門幫佢剪頭髮，來回機票當然由洗米華出，剪完仲會再醒三千蚊俾個髮型師。剪頭髮都剪到咁巴閉，洗米華真係江湖傳奇，古惑仔偶像。
爆哥乜料
金融界撈家，穿梭黑白政商界，朋友遍布旺角至中環，每星期都八到唔同料，同《壹》仔讀者過吓癮！
|
鍾意就快D Share啦！
|
|
|
