掃呢頁CODE去手機

2015年5月6日 星期三

童年時 童年方展博  18歲結婚 離婚黃寶龍:個仔都 16歲 [FACE - 415] 黃寶龍,MF,



童星出身嘅黃寶龍拍過劇又拍過戲,因為欠缺熱情而退出娛圈,之後幫手打理家族書店。

真面目

童年時 童年方展博  18歲結婚 離婚黃寶龍:個仔都 16歲

神劇《大時代》重播,再次成為熱話,唔只劉青雲、鄭少秋同劉松仁,連其他演員都成為焦點,飾演兒時青雲嘅童星黃寶龍亦唔例外,上周他接受本刊專訪時, 34歲黃寶龍分享退出娛圈原因,亦透露自己 18歲結婚、兩年前離婚,𠵱家有個 16歲兒子!

《大時代》幕幕精彩,黃寶龍就表示喊戲最難演,「最難都係喊戲,試過拍咗好多 take,最後仲要出動埋眼藥水!」電視畫面

黃寶龍先後拍過《大時代》、《 CYC家族》同《四個 32A和一個香蕉少年》,仲喺《四》中同唐寧有接吻戲,拍完呢套之後就退出娛圈專注發展個人事業,不過最近《大時代》再度翻 hit,佢都心郁郁想復出。

松哥教走位

23年前神劇《大時代》翻 hit,黃寶龍話第一次重翻都有睇,不過就唔係好明劇情,「𠵱家再睇番就再明多少少,屋企人都有一齊睇,朋友都有問嗰個係咪我?最記得當時松哥教我喺片場點走位。」問到退出娛圈的原因,他說:「嗰時對呢行唔係太熱情,想試吓其他嘢,所以走咗去賣衫,一搞就搞咗 10年。之後見到爸爸年紀開始大,如果書局冇改革就好難再營運,所以睇吓有冇新元素可以放落去,自己𠵱家做咗 2年,最開心見到啲客搵到想要嘅書,係一種推動力。」

問到感情狀況, 34歲黃寶龍就表現避忌,「其實我有個小朋友,不過早 2年就分開咗,佢跟媽咪,自己就拍緊拖,小朋友今年都 16歲。(好早結婚?)好早就生, 18、 19歲就結婚(嚴父?)自己都係一個幾固執嘅人,都鼓勵佢鍾意做咩就去做!」問到復出打算,黃寶龍話順其自然,「有同朋友傾過合作,不過最緊要時間上遷就到,因為經營書局要好多時間!」

黃寶龍同唐寧合作過唔少作品,兩人仲喺《四個 32A和一個香蕉少年》有咀戲,不過寶龍就話見得太多,完全冇心動嘅感覺喎!

同青雲冇同場戲份,不過黃寶龍就話有場戲份印象深刻,「原本有場唸詩戲,青雲想我拍先,再睇番我嘅表情、動作去演繹,不過自己當時太細個,拍咗 2日都未搞掂,後尾都要佢拍先!」

黃寶龍片場見過唔少明星,仲 keep住同劉德華嘅合照。

05年,黃寶龍一家三口宣傳服裝店,兒子個樣仲似足老豆。圖片

消失的童星

「童星」唔易做!仲要喺娛圈咁多年都可以站穩腳步,就更係難上加難!

張國權飾演嘅「殭屍仔」況復生已經係成人,淡出娛圈,上年中仲同圈外女友拉埋天窗成為人夫。

王嘉明喺《最佳拍檔》嘅「光頭仔」角色討人喜歡,試過入樂壇發展,現時主力經營生果生意。

鄭柏林 4歲時代表全港市民向查理斯王子和戴安娜王妃獻花,經典冬菇頭同小酒窩,已經係督察嘅小柏林,兩年前仲着住警察禮服舉行婚禮添。

鍾意就快D Share啦!