掃呢頁CODE去手機

2015年5月6日 星期三

有黃戲 黑社會都玩一人一票 杜汶澤吹雞黃絲開片 [FACE - 415] 杜汶澤,MF,



阿澤當晚要拍通宵戲,老婆田蕊妮都特登到場探班支持,阿澤未埋位前,阿田仲做埋攝影師,幫老公影靚相(小圖)。

真面目

有黃戲 黑社會都玩一人一票 杜汶澤吹雞黃絲開片

多個朋友點都好過多個敵人,好似杜汶澤同黃秋生咁,因為特首女梁齊昕而結怨年半,之後因為一場「雨傘運動」而破冰,關係修補。出名多計仔嘅阿澤仲即刻拉埋秋生、王宗堯,組成「黃絲團」合作演出新戲《選老坐》!新戲雖然又係玩黑社會題材,不過劇情有驚喜,事關阿澤諗到一人一票選大佬,將香港現時局勢搬落去電影,秋生當然舉腳贊成

一場「雨傘運動」,令娛圈唔少人怕被內地封殺而滅聲,幸好仲有一班良心英雄,好似何韻詩、黃耀明、杜汶澤、黃秋生同王宗堯無懼發聲,好似王宗堯咁,當日親身到金鐘支持學生,即被網民封為新一代「男神」,帶挈名氣同工作大增,阿澤開戲,指定搵佢㗎!

阿澤喺新戲做黑社會成員,所以冇刻意 keep fit,拍埋姜皓文身邊,即時變咗肥仔。

早前被爆偷食嘅吳浩康(右)都有份演出《選老坐》,阿澤仲話:「楊先生(楊受成)話如果開黑社會戲,唔搵呢個人係損失,我信。」唔知係褒定貶呢?

雖然王宗堯冇份落場,不過專登到場探班,好有心。

王宗堯︰反映社會狀況

阿澤因為公開支持「雨傘運動」而失去強國市場,唔少片商都因此卻步,期間阿澤只拍攝一套馬來西亞電影公司投資 1600萬的喜劇片《麻雀王》。

自知強國打唔入,做埋監製嘅阿澤,新戲《選老坐》加入唔少爆炸性劇情,秋生加王宗堯組成「黃絲團」。演員陣容有睇頭,劇情亦同樣有驚喜,據知阿澤戲中飾演黑幫成員,為咗兄弟力爭「一人一票」選坐館,將香港局面反映出來。上週四( 30日),大隊到尖沙咀拍攝劈友戲,當晚主要拍攝阿澤為救兄弟姜皓文而同死對頭吳浩康開片,至於冇份落場嘅王宗堯亦特登到場探班。本刊事後致電王宗堯,他說:

「呢部戲係阿澤聯絡我,之前《勝者為王》合作過,自己未拍過黑幫片,又未做過奸角,當然仲有秋生,好開心可以拍到。呢部戲講選話事人,自己就覺得有少少反映𠵱家某一啲社會狀況。」

破冰 friend番

去年 3月,阿澤同黃秋生因為特首女梁齊昕而交惡,幸好之後在「雨傘運動」中立場一致,關係得到破冰,當時仲約導演邱禮濤食飯,原來係傾劇本。

當日特首女梁齊昕同阿澤喺網上罵戰,秋生開 post暗串阿澤:「當你話人無知嘅時候,我真係想知你到底知幾多?當你話人冷血嘅時候,我又想知你到底有幾熱血?」

網上圖片

「黃絲團」

杜汶澤監製的《雛妓》大收旺場,今次新片《選老坐》同樣由邱禮濤執導,選角明顯有私心,專揀「黃絲」!雖然阿澤同秋生曾交惡,不過勝在大家立場一致,破冰話咁易,加埋王宗堯合成「黃絲團」,一齊演出新戲!

黃秋生向來敢言,「雨傘運動」中雖然身處上海拍劇,不過一樣貼身追貼新聞,仲不時在 fb發言支持學生。

阿澤在「雨傘運動」期間,亦有親身到金鐘支持。

《蘋果日報》圖片

王宗堯不時落場與學生共同進退,之後因為全副武裝聲援,而被網民封為新一代「男神」,更加因為咁而人氣急升。

網上圖片

鍾意就快D Share啦!