朱慧敏延婚期Eddie蒲頭箍煲
年初信誓旦旦會好好照顧朱慧敏（Queenie）的前EO2成員彭懷安（Eddie），被《好報》獨家踢爆偷嗒「長腿G.E.M.」，全城轟動！Queenie前晚忍痛為劇集開工，對於原定明年拉埋天窗，到底最後「婚」還是「分」？她心痛欲絕說：「我個人希望延遲（婚期）！」而Eddie昨晚現身時，表示女友已原諒他，對於婚期，心急箍煲的他表示一切等女友發落！
原本打算明年初結婚的藝人朱慧敏和彭懷安，連金豬都揀埋，但Eddie被《好報》獨家拍得午夜時分在北角偷嗒曾在電影《賭城風雲》系列做大茄的「長腿G.E.M.」陳惠敏，事件引起軒然大波，到底婚期會否如期舉行成為城中話題。繼Eddie在社交網向Queenie認錯後，Queenie前晚忍痛到堅尼地城為劇集《愛‧回家》開工。
繼爆出金句怒斥Eddie「同類事件並非第一次」後，被問到事件會否影響婚期？朱慧敏受訪時直言：「一定會（影響到）㗎原本打算年頭結，一直未公布日子，我個人希望延遲！呢件事畀到我哋磨練同成長嘅機會。我希望朝住開花結果為目標！」但當問到延婚，酒席是否要額外畀錢？Queenie斬釘截鐵說：「唔理得咁多」
為籌備婚事嘈交
Queenie又自爆得悉事件後失眠，原來她與男友冷戰已有一個月：「我睇到報道到依家都冇瞓過覺，我哋一個月冇聯絡，但唔關今次事，係我哋有問題出現，畀啲時間我！」是否同居？她說：「不嬲唔係，冇見面。」是否冷戰？Queenie坦言：「係！但唔關第三者事！」是否因籌備婚禮嘈交？她說：「各方面啦，但日子都係咁過，唔係世界末日嚟，睇吓佢點回應！」
問到可有一刻打算取消婚事？她說：「我依家答唔到你！」對於她指Eddie偷食有前科，Queenie表示事件仍未了解清楚。會否接受男友網上道歉及Eddie事發當晚有否透露行蹤？她說：「答唔到你接唔接受（道歉），佢有話去應酬，但細節冇講。」
雖然Queenie為Eddie偷食一事冇覺好瞓，但仍不忘為未婚夫講好話：「彭懷安係好人，心地善良，可能有時冇諗咁多，佢想送個女仔返屋企，我唔覺佢係會對我不忠或越軌，呢方面我信佢，只係有事情要出嚟回應，避免誤會。」她坦言曾叮囑男友要避忌，並說：「除非睇到好激烈或親熱嘅片或相，就可能OK Byebye！」會否叫Eddie出來交代，她說：「我唔會，如果佢成熟會自己出嚟。其實做錯唔緊要，做人要有責任心，如果有咩就避，關電話，sorry not my style。」而昨日Queenie在Whatsapp回應：「心情平復咗，有新決定再同大家講！」
認已獲女友原諒
另邊廂的男主角Eddie「潛水」一天後終在昨晚8時許，拖住外娚仔現身大埔，憔悴的他被問到心情如何？他口震震說：「要再同Queenie溝通吓，有聯絡過，要同佢解決我哋之間問題先，已經唔係講緊今次事件，係同佢婚禮上問題，因為未有共識，需要時間諗吓。（係咪有一個月冇聯絡？）係！」他承認此事已獲女友原諒，已向對方解釋事件，更謂：「佢信任我，總之會再同佢溝通，日後會畀個答覆大家。（佢話你已經唔係第一次。）我真係唔係第一次送人返屋企，主要係同女友交代，等佢安心，亦冇喺人哋屋企過夜。」為令女友安心，他今後會謝絕送女性朋友返家避嫌。
稱與「小三」唔太熟
談到Queenie想延後婚禮，Eddie表示雙方會按目標行事，並謂：「之後係點任由佢點做點講，我一心朝住結婚方向。（驚唔驚唔知延到幾時？）所以我要盡快溝通同解決，都要知佢想我點做，我都諗緊溝通內容，短期內會同Queenie見面。」事發後有否與「小三」聯絡？他冷笑一會謂：「其實同佢唔係好熟，都冇同佢聯絡。（個女仔話畀人誤會。）我都唔想講佢，依家只係專注喺女友度，同埋我以後會小心啲。」
文：專案組
採：影視組
攝：追蹤組
|
鍾意就快D Share啦！
|
|
|