黎國輝的台灣 dancer未婚妻連佳優（ YoYo）為張惠妹排舞師，阿感還埋騷就自由身，𠵱家得閒就去台灣陪女友及看鋪。網上圖片
真面目
冇碇企 有線黨迫走 染髮大細超 阿感控訴：余詠珊講過舊嘅要走
喺大台冇高層撐腰，任你幾有實力都一樣冇運行。
近年余詠珊權傾朝野，狂搵自己友有線幫入大台，曾經一度係 J2搶手主持嘅阿感（黎國輝），唔係「余黨」即被棄用，就算簽埋經理人合約都無嘢撈，連人生自由都冇埋，試過因為染髮被人照肺。不獲續約的阿感重提舊事依然火起，他說：「叻哥可以染頭髮，阿感就唔可以染，呢啲咩道理！」仲大爆冇後台嘅「親生仔」，自己敲監製門機會喎，他說：「經理人叫我自己去搵監製 social，我亦知有個由三、四綫敲到上一、二綫。」大台真係門常開喎。
35歲阿感（黎國輝） 2000年拍港台青春劇《青春@Y2K》入行(同劇有阿 Sa和余文樂等)，之後做港台 DJ再喺 10年入大台，由於做司儀騷多密食，大台見佢多 job有水可抽，即簽他為親生仔。他說：「我做咗好多街騷，有一日叫我上去藝員部，話要簽我做經理人約，跟住攞份合約俾我簽，我冇得揀㗎。」
約滿冇人理
做咗「親生仔」，阿感被派去 J2台做開荒牛，同范振鋒主持嘅《范後感》亦有口碑，但近年余詠珊入主大台，將自己當年有線舊將撬晒去大台，上年阿感即被掟去冇人睇嘅無綫網絡電視主持《低俗講波團》，之後就冇 job安排；半年前被通知完約，但原來阿感仲爭大台 20個騷，大台想叫阿感做番娛樂台跑腿，還完騷就正式 bye bye。
阿感說：「同佢哋傾咗開新節目還咗佢（騷）， 7月開拍可能會去台灣取景。我當還騷，同埋挑戰下佢哋（有線幫）囉！ Sandy（余詠珊）都有講過啦，舊嘅一定要走，新嘅先會嚟！」
由親生仔變棄將，阿感講起都火起。 13年試過因為染髮問題被高層照肺，他說：「叻哥可以染髮，阿感就唔可以！呢啲咩道理！」仲話啲經理人唔做嘢，他說：「佢哋叫我去敲監製門，自己搵啲監製 social，我自己𢱑生意，咁簽經理人做咩先？有好多人敲㗎，敲門分分鐘要排隊，有啲人因為咁多咗角色做，由啲三、四綫升到上二、三綫，之後一、二綫。」唔同你 friend做乜要俾嘢你做？排吓隊先
台灣發圍做潮人
阿感 7月做埋 J2節目還完 20個騷，同大台正式再見，不過離開大台阿感仲好搵，除咗同未婚妻喺台北市敦化南路開潮店 AYO_brand，阿感仲話多咗好多司儀騷做。他說：「我兩星期做咗 5個騷喇！月底仲有 1個！」
余黨常出現
講咗 N次余詠珊入咗大台後，幾乎將成個有線搬過嚟，回帶睇下佢啲「余黨」有幾叠馬啦，幾乎大台所有頻道都見到佢哋出現。
|
鍾意就快D Share啦！
|
|
|