歐遊唔夠喉 呃老豆陪鄭嘉穎過夜 陳凱琳處女開齋 [壹週刊 - 1320] 凱琳,鄭嘉穎,嘉穎,陳凱琳,M1,

鄭嘉穎與陳凱琳密遊巴黎，玩足五日四夜，返港後再直落宿一宵。

娛頭

歐遊唔夠喉　呃老豆陪鄭嘉穎過夜　陳凱琳處女開齋

中坑鄭嘉穎四十六歲有心有力，搞掂細自己二十三年，九十後的陳凱琳（ Grace），自稱未拍過拖守身如玉的大台處女，終於開齋！為提早陪女友迎接二十三歲生日，鄭嘉穎特別人肉速遞到法國，會合在當地開工的 Grace，共處五日四夜。

本週日（六月二十一日）父親節，二人拍拖返港， Grace未有回家交人陪老豆慶祝，反而直上男友位於大坑寓所再宿一宵。翌日陳父外出時，對於自己個女原來早一晚已由法國回港，竟懵然不知，「吓？落咗機？」

落機打情罵俏

搭完長途依然好好精神的陳凱琳難掩興奮，不停撩鄭嘉穎傾偈。

生猛撩男友

月中出席完上海電影節後，陳凱琳隨即飛往法國，為 TVB拍攝賽車節目。校啱時間，鄭嘉穎於十五號凌晨坐夜機飛往巴黎，會合已經完成拍攝工作，可以離隊的 Grace，浪漫巴黎！

五日四夜拍拖之旅眨眼過，本週日（六月二十一日）父親節早上，二人雙雙由巴黎回港。搭完十三個鐘長途機，後生精力充沛的 Grace，全程似開籠雀，不停指手畫腳撩男友傾偈，十分生猛，但鄭嘉穎堅持 cool爆，冇表情冇反應。

拎完行李出閘，開始進入一級戒備狀態，二人分開行， Grace一馬當先，急急腳行去停車場上保母車，隔十分鐘後，鄭嘉穎才出現，二人同車齊齊返回大坑的寓所。

早前接受訪問時，被問到會否帶埋鄭嘉穎同家人慶祝父親節， Grace早有鋪排，「我喺法國做嘢，長途機喎！嘉穎都喺內地有工作！」其實二人已計劃好，父親節撇甩屋企人，繼續二人世界。

父親節當日七點早機返到香港， Grace一直留守男友屋企過夜，未有回家陪父親慶祝；直至翌日（二十二日）下午一點，她才坐住鄭嘉穎的保母車，返回九龍塘寓所。

「 Grace以前好乖女，去邊都會同父母交代，但入咗行再加埋拍拖之後，成日早出晚歸，有時仲唔返屋企瞓，佢爸爸問佢去邊，咪話開工囉！」知情者透露。

21/6 7:00am到港

出閘後，二人刻意前後腳，陳凱琳先上車，約十分鐘後，鄭嘉穎才出現，齊齊返回男方寓所。

返歸冇耐，陳凱琳再外出，坐巴士返電視城開工。

處女黨

圈中有不少女藝人是虔誠基督教徒，因信仰而堅拒婚前性行為，奉守戒律，被列入「處女組」。

岑麗香

被封為無綫「四大處女」之一，堅守處女之身，並與鍾嘉欣、苟芸慧等姊妹組成「處女組」。

王君馨

於美國長大的王君馨，性格鬼妹，但自爆仍是處女之身，堅拒婚前性行為，更曾因為拒絕與男友發生性行為而分手收場。

鄧紫棋（ G.E.M.）

虔誠 G.E.M.曾多次表示，信仰唔支持佢有婚前性行為，自稱是處女，話到明第一次要留俾老公，即使當年與林宥嘉打得火熱，亦聲稱未拆「禮物」，經常拒絕男友要求。

唔知個女返咗

對於女兒為了陪男友隱瞞歸期，返咗香港扮未返，陳父既不滿又無奈。

壹：記者　陳：陳凱琳老豆

壹： Grace冇陪你過父親節？

陳：冇呀！佢唔喺香港！

壹：佢尋晚冇返屋企瞓？

陳：未返嚟呀！

壹：但我哋影到佢落機！

陳：吓？落咗機？我都唔知喎！佢冇同我講幾時返嚟！佢係去做嘢啫。

壹：佢做完嘢 stay咗幾日同鄭嘉穎玩。

陳：我唔知喎……真係唔知！

壹：佢有冇打電話返嚟？

陳：冇呀！ WhatsApp咋！

壹：冇話俾你知自己返咗香港？

陳：冇呀！未講！

壹：去咗鄭嘉穎屋企瞓喎？

陳：我唔知！

壹：你對鄭嘉穎印象點？

陳：我都未見過佢本人，又未同佢傾過偈，未交談過。

壹： Grace冇諗住帶佢返嚟見你？

陳：我唔知佢係咪同佢（鄭嘉穎）一齊。

壹：咁真係一齊，你滿唔滿意呢個男朋友？

陳：做朋友就冇問題嘅，又唔係講到結婚，邊有咁快吖！

壹：做男朋友就要考慮清楚？

陳：睇吓佢自己點諗啦，我都控制唔到咁多㗎喇！

22/6 1:15pm返歸

被問到在法國是否與男友同房，陳凱琳口窒：「我係去做嘢㗎！」

陳父憤怒

陳父得知女兒回港後未有返屋企陪他過父親節，一臉愕然：「而家我都控制唔到。」

同房定分房

被封為「大台處女」的 Grace，出道時曾自認「聖女」，「我都係處女！婚後先有性行為！」

女友因為信仰「守處」，早前拍攝劇集《殭》時，鄭嘉穎被爆向同屬「處女黨」的陳嘉寶請教禁慾心得，對此，鄭嘉穎亦坦白承認，「我哋係有傾宗教嘅嘢，有提到婚前性行為，我問佢（指陳嘉寶）男友點算？其實我好尊重每個人宗教信仰。」

拍拖浪漫法國再直落度春宵，翌日（二十二日）傍晚， Grace外出開工時春風滿面，被問到是否已經「破處」，她避重就輕。

壹：記者　 G： Grace

壹：玩得開唔開心？

G：我去法國係做嘢㗎！

壹：影到你同鄭嘉穎一齊落機，佢去法國搵你？

G：其實我唔想講太多，因為都係私人嘢。

壹：你係基督教徒，同佢嘅價值觀有冇唔同？

G：其實佢都知我信仰，佢都好尊重，同埋我覺得兩個人相處都係要慢慢嚟！尤其係信仰呢啲嘢，我覺得可能遲啲唔排除一齊返教會，我知佢都唔抗拒嘅！

壹：性方面會唔會有好大引誘？

G：因為我哋真係好鍾意大家嘅性格，傾偈都好開心，呢啲係其次。

壹：你哋今次喺法國係一房定兩間房？

G：我今次係去工作啫。

壹：鄭嘉穎之前咁多女朋友，會唔會令你冇信心？

G：每個人都有過去，拍拖都係正常嘅事。

被記者踢爆歐遊，鄭嘉穎即時發爛渣，「做啲嘢唔見得光㗎！」

笑笑口嘅鄭嘉穎先㩒低鏡頭再出手箍實記者唔放，行為失控。

在新劇《殭》的煞科宴上，二人仍死撐雙方關係「仍在了解中」。

飛到法國為無綫拍攝賽車節目後，再與鄭嘉穎共度美好時光，陳凱琳公私兩忙。

唔願見光

至於鄭嘉穎，被問到同 Grace密遊法國一事，反應十分抗拒，一手㩒低記者鏡頭說：「你係，我唔會答你！」之後又箍實記者口噏噏：「唔好問咁八卦，私人嘢！」臨上車前，再加一句：「做啲嘢唔見得光㗎！」

男未娶女未嫁，拍拖點解唔見得光呢！

拍攝劇集《殭》的咀戲時，主動熱情的陳凱琳，收放自如，完全冇尷尬。

早前鄭嘉穎被踢爆向同屬「處女黨」的陳嘉寶請教禁慾心得。

家教甚嚴的陳凱琳，以往開工拍劇，陳母都會跟實監場。

考你定力

在《聖經》的基礎，「婚姻人人都當尊重，床也不可污穢，婚姻以外的淫行，神必會審判」，但有幾多人真係可以咁有定力，堅守戒約！

朱茵　黃貫中（破戒）

作為虔誠的基督徒，朱茵一直堅拒婚前性行為，與黃貫中拍拖 14年，一直只保持同居關係，但 12年突然爆出未婚懷孕。

鄭秀文　許志安（破戒）

有宗教信仰的 Sammi，婚前一直堅持與男友分開住； 13年，因被大業主收樓逼遷， Sammi破戒搬到干德道殷豪閣與安仔同居，消息爆出後，虔誠的 Sammi即結束三個月同居生活，搬到淺水灣回復獨居生活。

李亞男　王祖藍（守戒）

李亞男和王祖藍都是虔誠教徒，堅守不作婚前性行為，並雙雙誓神劈願不會破戒，婚前，即使李亞男一個人在香港生活，仍拒絕與男友同居。

商天娥　李偉誠（守戒）

10年，與拍拖五年的燈飾商人男友李偉誠（ Patrick）結婚，婚前二人已過着同居生活，但男友亦尊重身為基督徒的娥姐，堅守禁慾，同居不同床，後來 Patrick更決志信主，齊齊守戒。

鍾意就快D Share啦！

下一篇 》