近日開拍的《愛•回家 2》，雖然新血有張繼聰，黃翠如及麥長青等，但亦有舊人穿插，換血換到唔湯唔水。
探熱針
乜都得 角色新舊兩撈 《愛•回家 2》變穿越劇
《愛•回家》八月收檔，接力的新處境劇劇名搬字過紙，《愛•回家 2》！
劇名炒冷飯，人物角色亦一樣。據悉，由舊劇直通去《愛•回家 2》的六名演員，其中三個角色不變，另外三個換新身份，處境劇變成穿越劇，大台高招！
循環再用
播足三年，長氣處境劇《愛•回家》欲斷難斷，接棒的新處境劇索性叫《愛•回家 2》；劇中骨幹由馬家及律師樓變成海味鋪同健身中心，無綫編劇夠晒環保，一於循環再用，諗都唔使諗！
據了解，搭直通車到《愛•回家 2》的黎諾懿，繼續以「馬壯」身份，與律師樓同事的張達倫及楊卓娜「嚴謹夫婦」在新劇出現，至於曾經在《愛》劇中飾演餐廳主管的馬海倫、飾演黃德斌細妹的龔嘉欣、律師樓古明華的徒弟張振朗，三人角色均屬全新；所以，當「馬壯」、「嚴謹」夫婦在新劇遇上呢班「舊相識」時，已恍如隔世。
珍姐落旨
其實《愛•回家 2》的男女主角已換上張繼聰及黃翠如，唔一炮過換血，只因太后點燈，話點就點。
「其實監製個位都換咗由羅鎮岳負責，佢都唔想班演員新唔新，舊唔舊，會好尷尬；但珍姐（曾勵珍）擔心班師奶觀眾一時間睇唔慣，所以要留低馬壯（黎諾懿）同嚴謹夫婦（張達倫及楊卓娜）呢幾個角色幫手過渡。
至於龔嘉欣同張振朗都係珍姐點名要力捧，馬海倫就更加唔使講，係人都知佢哋係手帕交！其實馬海倫個新角色俾任何一個甘草做都得，但處境劇易爆騷又輕鬆，呢啲筍 job，當然益番自己人。所以就算舊撈新，觀眾會混淆，但珍姐嘅主意，無人敢出聲。」劇組工作人員爆。
|
鍾意就快D Share啦！
|
|
|