探熱針
冷待大仔 被屈廿年 錢小豪：我想見個仔都難
錢小豪跟前妻郭秀雲所生的兒子龐景峰（ Andrew，隨繼父姓）簽約韓國公司做歌手，由於新沙士肆虐，不知情的錢小豪做訪問時表示擔心在韓國受訓的兒子安全，一點關心，竟觸動分開二十二年的郭秀雲撲出來炮轟，認為前夫借機「抽水」宣傳自己。
對於前妻自說自話，錢小豪終於打破多年沉默，多年被指唔理個仔，冇俾贍養費以及改名改姓等「故事」的真實版，逐樣講，對於兒子 Andrew，錢小豪說：「我見佢都難！」
諸多留難
被郭秀雲大數不是，屈埋屈埋的錢小豪，終於忍不住拆局！
當年和前妻離婚，為爭取兒子的撫養權，錢小豪跟郭秀雲對簿公堂，甚至不惜輸掉全副身家。
「咁多年來我唔想講，係因為當年阿仔（景峰）細，父母離婚已經好慘，如果再喺佢面前嘈，會影響佢成長，所以我一直忍讓。而家佢大個，我係時候講出嚟。
「離婚之後，法庭判咗兩星期見一次面，佢（景峰）可以喺我屋企過夜。到四、五歲左右，我哋（跟郭秀雲）已經唔可以直接對話，佢只會搵秘書同我聯絡，我同阿仔亦得星期日見面，阿仔通常要學好多嘢，我去接佢都已經係下晝三、四點，食餐飯又要送佢走，因為第二朝要返學。
「如是者，我同阿仔相處時間愈來愈少，有時佢又會話阿仔有嘢做，要隔幾個星期先俾見面。我記得試過成八個月冇見，我唔記得咩事，總之佢話有事，唔可以見。」錢小豪首次開腔透露父子關係疏離的原因。
自晒造型相
郭秀雲無厘頭指責錢小豪將兒子的造型相發給傳媒，其實在他的 Instagram，可以隨時搵到 Andrew在韓國及美國受訓時的相片。
祝福大仔
郭秀雲更以為前夫將景峰發給他在韓國的最新造形相（實情是景峰放 Instagram的相）轉給傳媒，乘機抽水！
「去年聖誕我哋撞過一次，我都有走埋去同佢哋影咗張相，之後呢張相都冇 send番俾我，我又點會搵到佢啲相 send俾人。我係都抽自己水啦，唔需要利用個仔，事實係有記者問我，先知佢原來去咗韓國做歌手。」
因景峰入行，觸發跟前妻廿幾年的恩怨，錢小豪認為可以承受，亦都不重要。
「呢個世界鍾意自說自話嘅人好多，可能係對方唔記得咗，又或者講多咗嘢，我唔怪佢！我只希望大仔順順利利做到自己理想，我度大門係時時為佢打開，至於有人再講嘢，我就唔會再回應。」錢小豪說。
自說自話
郭秀雲指景峰五歲時，錢小豪跟他在大馬路踩單車，因他疏忽以致兩父子失散多個小時，景峰要到晚上才見番爸爸。
「成件事係佢自說自話，一個成年人都知，如果小朋友踩單車，都應該去草地；同埋如果大家有分析能力，都應該相信到夜晚先搵得番個小朋友，馬路又有巴士、 van仔，我冇理由之前唔報警。我覺得係佢自己諗出嚟！」
相隔二十二年，前妻突然翻舊賬，指他未有俾贍養費，不過，原來內有文章。
「離婚後，佢提議象徵式收我一蚊贍養費。我點會唔想照顧個仔，我連見佢都難，根本唔知佢需要乜嘢，我又點可以俾到佢。如果阿仔有時間，我都想同佢一齊去旅行親子樂，又點會話一蚊都唔俾呢？冇見面冇溝通，阿仔要衫要鞋，我冇理由唔買俾佢，呢啲我絕對做到。」錢小豪說。
兒子被改名五次 錢小豪：佢都好慘！
錢小豪與前妻郭秀雲所生的兒子景峰，現年 25歲。隨繼父生活的他，前後改名五次，近年甚至連姓氏都改埋。景峰原名錢浩然，兩歲時父母離異，郭秀雲改嫁龐氏家族後人，成為繼子的他，先後改名錢錡夫、錢梓宏及錢景峰。由於廿一歲前改姓需經父母簽字同意，為免驚動生父，當時要跟後父姓的他，唯有硬加龐姓在前，變「雙姓人」龐錢景峰。直到滿廿一歲，終除父姓，改叫龐景峰。
對於親兒五度改名，錢小豪好無奈。「改咗五次我都控制唔到，隔幾年又改一個，我都好混淆。出世時爺爺幫佢改名叫浩然，離婚後，佢媽咪幫佢改另一個，之後改得太多，做佢都好慘，連我都唔知叫佢咩名好。」
兒子換姓，作為父親的錢小豪亦是從傳媒口中得知，最痛莫過於此。「十個男人有九個都唔想㗎啦，點會想個仔跟其他人姓呀！」
|
鍾意就快D Share啦！
|
|
|